ਟੈਕਸਾਸ ’ਚ ਤਿੰਨ ਸ਼ਿਕਾਰੀਆਂ ਦੀ ਮੌਤ, ਟੋਏ ’ਚ ਡਿੱਗੇ ਕੁੱਤੇ ਨੂੰ ਬਚਾਉਣ ਦੀ ਕਰ ਰਹੇ ਸਨ ਕੋਸ਼ਿਸ਼

Texas – ਟੈਕਸਾਸ ਵਿਖੇ ਇੱਕ ਟੋਏ ’ਚ ਡਿੱਗੇ ਕੁੱਤੇ ਨੂੰ ਬਚਾਉਣ ਦੀ ਕੋਸ਼ਿਸ਼ ’ਚ ਤਿੰਨ ਸ਼ਿਕਾਰੀਆਂ ਦੀ ਦਰਦਨਾਕ ਮੌਤ ਹੋ ਗਈ। ਸਥਾਨਕ ਅਧਿਕਾਰੀਆਂ ਵਲੋਂ ਇਸ ਗੱਲ ਦੀ ਪੁਸ਼ਟੀ ਕੀਤੀ ਗਈ ਹੈ ਜਾਣਕਾਰੀ ਮੁਤਾਬਕ ਚਾਰ ਵਿਅਕਤੀਆਂ ਦੇ ਇੱਕ ਟੋਲੇ ਨੇ ਆਪਸ ’ਚ ਮਿਲ ਕੇ ਸੂਰ ਦਾ ਸ਼ਿਕਾਰ ਕਰਨ ਦੀ ਯੋਜਨਾ ਬਣਾਈ ਸੀ। ਇਸੇ ਦੌਰਾਨ ਉਨ੍ਹਾਂ ਦਾ ਕੁੱਤਾ ਉਨ੍ਹਾਂ ਦੇ ਟਰੱਕ ’ਚੋਂ ਬਚ ਕੇ ਆਸਟਿਨ ਦੇ ਬਾਹਰ ਬੈਸਟ੍ਰਾਪ ਕਾਊਂਟੀ ’ਚ ਮੱਕੀ ਦੇ ਇੱਕ ਖੇਤ ’ਚ ਚਲਾ ਗਿਆ। ਇਸੇ ਦੌਰਾਨ ਕੁੱਤਾ ਇੱਕ ਭੂਮੀਗਤ ਟੈਂਕ ’ਚ ਡਿੱਗ ਗਿਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਹਾਦਸੇ ਤੋਂ ਬਾਅਦ ਇੱਕ ਵਿਅਕਤੀ ਨੇ ਕੁੱਤੇ ਨੂੰ ਬਚਾਉਣ ਲਈ ਟੈਂਕ ’ਚ ਛਾਲ ਮਾਰ ਦਿੱਤੀ ਅਤੇ ਇਸ ਮਗਰੋਂ ਦੋ ਹੋਰਨਾਂ ਨੇ ਉਨ੍ਹਾਂ ਨੂੰ ਬਚਾਉਣ ਲਈ ਛਾਲ ਮਾਰੀ। ਇਸ ਮਗਰੋਂ ਇਸ ਟੋਲੀ ਦੇ ਚੌਥੇ ਮੈਂਬਰ ਨੇ ਸਹਾਇਤਾ ਲਈ ਪੁੁਲਿਸ ਨੂੰ ਫੋਨ ਕੀਤਾ। ਪੁਲਿਸ ਅਧਿਕਾਰੀਆਂ ਨੇ ਕਿਹਾ ਕਿ ਜਦੋਂ ਤੱਕ ਉਹ ਘਟਨਾ ਵਾਲੀ ਥਾਂ ’ਤੇ ਪਹੁੰਚੇ, ਉਸ ਵੇਲੇ ਤੱਕ ਤਿੰਨਾਂ ਸ਼ਿਕਾਰੀਆਂ ਅਤੇ ਕੁੱਤੇ ਦੀ ਮੌਤ ਹੋ ਚੁੱਕੀ ਸੀ। ਮਿ੍ਰਤਕਾਂ ’ਚ ਦੋ ਮਰਦ ਅਤੇ ਇੱਕ ਔਰਤ ਸ਼ਾਮਿਲ ਸੀ ਅਤੇ ਉਨ੍ਹਾਂ ਦੀ ਪਹਿਚਾਣ ਡੇਲਵਿਸ ਗਾਰਸੀਆ (37), ਡੈਨਿਸ ਮਾਰਟੀਨੇਜ਼ (26) ਅਤੇ ਨੋਏਲ ਵਿਗਿਲ-ਬੈਨੀਟੇਜ਼ (45) ਦੇ ਰੂਪ ’ਚ ਹੋਈ ਹੈ। ਸਾਰੇ ਫਲੋਰਿਡਾ ਦੇ ਰਹਿਣ ਵਾਲੇ ਸਨ।