IPL 2025: ਭਾਰਤੀ ਗਰਮੀਆਂ ਦੇ ਕ੍ਰਿਕਟ ਸੀਜ਼ਨ ਦੀਆਂ ਤਰੀਕਾਂ ਦਾ ਤੁਰੰਤ ਐਲਾਨ ਕਰ ਦਿੱਤਾ ਗਿਆ ਹੈ। ਇਸ ਵਾਰ, 2025 ਸੀਜ਼ਨ ਦੇ ਨਾਲ-ਨਾਲ 2026 ਅਤੇ 2027 ਲਈ ਆਈਪੀਐਲ ਦੇ ਆਯੋਜਨ ਦੀਆਂ ਤਰੀਕਾਂ ਦਾ ਵਿਸਤ੍ਰਿਤ ਸ਼ਡਿਊਲ ਜਾਰੀ ਕੀਤਾ ਗਿਆ ਹੈ। ਇਸ ਵਾਰ ਆਈਪੀਐਲ ਵਿੱਚ 10 ਟੀਮਾਂ ਵਿਚਾਲੇ 74 ਮੈਚ ਖੇਡੇ ਜਾਣਗੇ। ਇਸ ਵਾਰ ਆਈਪੀਐਲ ਦੀ ਨਿਲਾਮੀ 24-25 ਨਵੰਬਰ ਨੂੰ ਸਾਊਦੀ ਅਰਬ ਦੇ ਜੇਦਾਹ ਵਿੱਚ ਹੋਵੇਗੀ। ਨਿਲਾਮੀ ਭਾਰਤੀ ਸਮੇਂ ਅਨੁਸਾਰ ਦੁਪਹਿਰ 3 ਵਜੇ ਸ਼ੁਰੂ ਹੋਵੇਗੀ।

ਇਕ ਰਿਪੋਰਟ ਮੁਤਾਬਕ IPL ਫਰੈਂਚਾਇਜ਼ੀਜ਼ ਨੂੰ ਵੀਰਵਾਰ ਨੂੰ ਈਮੇਲ ਰਾਹੀਂ ਇਸ ਦੀ ਜਾਣਕਾਰੀ ਦਿੱਤੀ ਗਈ। ਹਾਲਾਂਕਿ, 2022 ਵਿੱਚ, ਜਦੋਂ 2023-27 ਲਈ ਆਈਪੀਐਲ ਖੇਡ ਪ੍ਰਸਾਰਣ ਅਧਿਕਾਰ ਵੇਚੇ ਗਏ ਸਨ, ਇਹ ਘੋਸ਼ਣਾ ਕੀਤੀ ਗਈ ਸੀ ਕਿ 2025 ਅਤੇ 2026 ਸੀਜ਼ਨ ਲਈ 84 ਮੈਚ ਆਯੋਜਿਤ ਕੀਤੇ ਜਾਣਗੇ। 2027 ਸੀਜ਼ਨ ਲਈ ਵੱਧ ਤੋਂ ਵੱਧ 94 ਮੈਚ ਕਰਵਾਏ ਜਾਣੇ ਸਨ। ਪਰ ਤਾਜ਼ਾ ਜਾਣਕਾਰੀ ਅਨੁਸਾਰ ਪਿਛਲੀ ਵਾਰ ਵਾਂਗ ਇਸ ਵਾਰ ਵੀ 74 ਮੈਚ ਹੋਣਗੇ। ਆਈਪੀਐਲ 2026 ਸੀਜ਼ਨ ਦੇ ਸਾਰੇ ਮੈਚ 15 ਮਾਰਚ ਤੋਂ 31 ਮਈ ਦਰਮਿਆਨ ਖੇਡੇ ਜਾਣਗੇ, ਜਦੋਂ ਕਿ 2027 ਆਈਪੀਐਲ ਸੀਜ਼ਨ 14 ਮਾਰਚ ਤੋਂ 30 ਮਈ ਦਰਮਿਆਨ ਖੇਡਿਆ ਜਾਵੇਗਾ।

ਇਸ ਆਈ.ਪੀ.ਐੱਲ. ‘ਚ ਸਾਰੀਆਂ 10 ਫਰੈਂਚਾਇਜ਼ੀਜ਼ ਨੇ ਆਪਣੇ ਪਸੰਦੀਦਾ ਖਿਡਾਰੀਆਂ ਨੂੰ ਬਰਕਰਾਰ ਰੱਖਿਆ ਹੈ। ਰਾਜਸਥਾਨ ਰਾਇਲਜ਼ ਨੇ ਆਪਣੇ ਪਰਸ ਵਿੱਚੋਂ ਸਭ ਤੋਂ ਵੱਧ 79 ਕਰੋੜ ਰੁਪਏ ਖਰਚ ਕੀਤੇ ਹਨ, ਜਦਕਿ ਪੰਜਾਬ ਕਿੰਗਜ਼ ਨੇ ਹੁਸ਼ਿਆਰੀ ਦਿਖਾਉਂਦੇ ਹੋਏ ਸਿਰਫ਼ 9.5 ਕਰੋੜ ਰੁਪਏ ਹੀ ਕੱਢੇ ਹਨ। ਹੈਨਰੀ ਕਲਾਸੇਨ, ਜੋ ਕਿ ਸਭ ਤੋਂ ਮਹਿੰਗਾ ਰਿਟੇਨ ਕੀਤਾ ਗਿਆ ਖਿਡਾਰੀ ਸੀ, ਉਸ ਨੂੰ ਸਨਰਾਈਜ਼ਰਸ ਹੈਦਰਾਬਾਦ ਨੇ ਆਪਣੀ ਟੀਮ ਨਾਲ ਜੋੜਿਆ ਹੈ। ਇਸ ਵਾਰ ਦੇ ਆਈਪੀਐਲ ਵਿੱਚ ਕੁੱਲ 1574 ਖਿਡਾਰੀਆਂ ਨੇ ਰਜਿਸਟਰ ਕੀਤਾ ਸੀ, ਜਿਨ੍ਹਾਂ ਵਿੱਚੋਂ 574 ਖਿਡਾਰੀਆਂ ਨੂੰ ਸ਼ਾਰਟਲਿਸਟ ਕੀਤਾ ਗਿਆ ਹੈ। 12 ਮਾਰਕੀ ਖਿਡਾਰੀ ਵੀ ਰੱਖੇ ਗਏ ਹਨ, ਜਿਨ੍ਹਾਂ ਦੀ ਬੇਸ ਪ੍ਰਾਈਸ 2 ਕਰੋੜ ਰੁਪਏ ਹੈ।

The post IPL 2025: ਹੋ ਗਿਆ ਐਲਾਨ, ਇਸ ਤਾਰੀਖ ਤੋਂ ਸ਼ੁਰੂ ਹੋਵੇਗਾ IPL appeared first on TV Punjab | Punjabi News Channel.