Vancouver – ਜਗਮੀਤ ਸਿੰਘ ਨੇ ਦੱਸਿਆ ਹੈ ਕਿ ਲਿਬਰਲ ਸਰਕਾਰ ਨੂੰ ਉਨ੍ਹਾਂ ਦਾ ਸਮਰਥਨ ਹਾਸਿਲ ਕਰਨ ਵਾਸਤੇ ਕੀ ਕਰਨਾ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਜੇ ਜਸਟਿਨ ਟਰੂਡੋ ਦੀ ਸਰਕਾਰ ਉਨ੍ਹਾਂ ਕੋਲੋਂ ਸਪੋਰਟ ਚਾਹੁੰਦੀ ਹੈ ਤਾਂ ਉਨ੍ਹਾਂ ਨੂੰ ਮਹਾਮਾਰੀ ਨਾਲ ਸਬੰਧਤ ਵਿੱਤੀ ਰਾਹਤ ਤੋਂ ਲੈ ਕੇ ਪੇਡ ਸਿਕ ਲੀਵ ਤੱਕ, ਕਈ ਮੁੱਦਿਆਂ ਬਾਰੇ “ਠੋਸ ਅਤੇ ਤੁਰੰਤ” ਕਰਮ ਉਠਾਉਣੇ ਪੈਣਗੇ।ਜੀ ਹਾਂ, NDP ਲੀਡਰ ਜਗਮੀਤ ਸਿੰਘ ਵੱਲੋਂ ਇਨ੍ਹਾਂ ਵਿਚਾਰਾਂ ਦੀ ਸਾਂਝ ਓਟਵਾ ਵਿਚ ਆਯੋਜਿਤ ਇੱਕ ਨਿਊਜ਼ ਕਾਨਫ਼ਰੰਸ ਦੌਰਾਨ ਪਾਈ ਗਈ। ਇਸ ਮੌਕੇ ਜਗਮੀਤ ਸਿੰਘ ਨੇ ਐਨਡੀਪੀ ਦੀ ਸੂਚੀ ਜਾਰੀ ਕੀਤੀ ਜਿਸ ਵਿਚ ਫ਼ੈਡਰਲ ਵੈਕਸੀਨ ਪਾਸਪੋਰਟ ਵੀ ਸ਼ਾਮਲ ਹੈ। ਜਗਮੀਤ ਸਿੰਘ ਨੇ ਦੱਸਿਆ ਕਿ ਉਹ ਵੈਕਸੀਨ ਪਾਸਪੋਰਟ ਦੇ ਹੱਕ ‘ਚ ਹਨ। ਉਨ੍ਹਾਂ ਕਿਹਾ ਕਿ ਪਹਿਲਾਂ ਵੀ ਇਸ ਬਾਰੇ ਗੱਲਬਾਤ ਹੁੰਦੀ ਰਹੀ ਹੈ ਅਤੇ ਜਸਟਿਨ ਟਰੂਡੋ ਨੇ ਵੀ ਇਸ ਬਾਰੇ ਗੱਲ ਕੀਤੀ ਸੀ ਪਰ ਉਨ੍ਹਾਂ ਨੇ ਇਸ ਬਾਰੇ ਕੀਤਾ ਕੁਝ ਨਹੀਂ।
ਦੱਸਦਈਏ ਕਿ 2021 ਦੀਆਂ ਹੋਈਆਂ ਫ਼ੈਡਰਲ ਚੋਣਾਂ ਵਿਚ ਐਨਡੀਪੀ ਨੂੰ 25 ਸੀਟਾਂ ਮਿਲੀਆਂ ਹਨ। ਲਿਬਰਲ ਪਾਰਟੀ ਨੂੰ ਇਨ੍ਹਾਂ ਚੋਣਾਂ ‘ਚ ਬਹੁਮਤ ਨਹੀਂ ਮਿਲ ਸਕੀ ਜਿਸ ਕਾਰਨ ਘੱਟਗਿਣਤੀ ਸਰਕਾਰ ਦੌਰਾਨ ਪਾਰਲੀਮੈਂਟ ਵਿਚ ਐਨਡੀਪੀ ਦੀ ਭੁਮਿਕਾ ਮਹੱਤਵਪੂਰਨ ਹੋਵੇਗੀ। ਬੁੱਧਵਾਰ ਨੂੰ ਐਨਡੀਪੀ ਦੇ ਐਮਪੀਜ਼ ਕੌਕਸ ਮੀਟਿੰਗ ਵਿਚ ਇਕੱਠੇ ਹੋਏ ਸਨ, ਜਿੱਥੇ ਪਾਰਟੀ ਦੀਆਂ ਤਰਜੀਹਾਂ ਬਾਰੇ ਵਿਚਾਰ ਚਰਚਾ ਕੀਤੀ ਗਈ। ਜਗਮੀਤ ਸਿੰਘ ਚਾਹੁੰਦੇ ਹਨ ਕਿ ਫ਼ੈਡਰਲ ਸਰਕਾਰ, ਕੋਰੋਨਾ ਨਾਲ ਸਬੰਧਤ ਕੰਮਾਂ ਦੇ ਨਾਲ ਨਾਲ, ਕਲਾਇਮੇਟ ਚੇਂਜ ਅਤੇ ਰੀਕਨਸੀਲੀਏਸ਼ਨ ਦੇ ਵਿਸ਼ਿਆਂ ‘ਤੇ ਵੀ ਠੋਸ ਕਦਮ ਉਠਾਏ।
ਐਲਬਰਟਾ ਅਤੇ ਸਸਕੈਚਵਨ ਵਿਚ ਕੋਵਿਡ ਦੀ ਲਗਾਤਾਰ ਵਿਗੜਦੀ ਸਥਿਤੀ ਦਾ ਹਵਾਲਾ ਦਿੰਦਿਆਂ, ਜਗਮੀਤ ਸਿੰਘ ਨੇ ਫ਼ੈਡਰਲ ਸਰਕਾਰ ਨੂੰ, ਕੈਨੇਡਾ ਐਮਰਜੈਂਸੀ ਵੇਜ ਸਬਸਿਡੀ ਅਤੇ ਕੈਨੇਡਾ ਐਮਰਜੈਂਸੀ ਰੈਂਟ ਸਬਸਿਡੀ ਵਰਗੇ ਵਿੱਤੀ ਰਾਹਤ ਪ੍ਰੋਗਰਾਮ ਜਾਰੀ ਰੱਖਣ ਦੀ ਮੰਗ ਕੀਤੀ। ਇਸ ਦੇਨਾਲ ਹੀ ਉਨ੍ਹਾਂ ਵੱਲੋਂ ਐਲਬਰਟਾ ਦੇ ਹਾਲਾਤਾਂ ਬਾਰੇ ਸੂਬਾ ਸਰਕਾਰ ਨੂੰ ਜਿੰਮੇਵਾਰ ਦੱਸਿਆ ਗਿਆ ਹੈ।

The post Jagmeet Singh ਨੇ ਦੱਸੀਆਂ ਆਪਣੀਆਂ ਸ਼ਰਤਾਂ appeared first on TV Punjab | Punjabi News Channel.

Vancouver – ਕੈਨੇਡਾ ‘ਚ ਹੋਈਆਂ ਫ਼ੈਡਰਲ ਚੋਣਾਂ ਦੇ ਚੋਣ ਨਤੀਜਿਆਂ ਤੋਂ ਹੁਣ ਗ੍ਰੀਨ ਪਾਰਟੀ ਦੀ ਲੀਡਰ ਨੇ ਅਸਤੀਫ਼ਾ ਦੇਣ ਦਾ ਐਲਾਨ ਕਰ ਦਿੱਤਾ ਹੈ। ਇਨ੍ਹਾਂ ਚੋਣਾਂ ‘ਚ ਹੋਈ ਹਾਰ ਅਤੇ ਪਾਰਟੀ ਦੇ ਮਾੜੇ ਪ੍ਰਦਰਸ਼ਨ ਤੋਂ ਬਾਅਦ ਗ੍ਰੀਨ ਪਾਰਟੀ ਲੀਡਰ ਅਨੈਮੀ ਪੌਲ ਨੇ ਐਲਾਨ ਕੀਤਾ ਕਿ ਉਹ ਅਹੁਦੇ ਤੋਂ ਅਸਤੀਫ਼ਾ ਦੇ ਰਹੇ ਹਨ। ਇਸ ਤੋਂ ਬਾਅਦ ਇੱਕ ਸਾਲ ਤੋਂ ਘੱਟ ਸਮੇਂ ਦੇ ਅੰਦਰ ਹੀ ਇੱਕ ਵਾਰੀ ਫ਼ਿਰ ਗ੍ਰੀਨ ਪਾਰਟੀ ਨੂੰ ਨਵਾਂ ਲੀਡਰ ਚੁਣਨਾ ਹੋਵੇਗਾ । ਜਾਣਕਾਰੀ ਲਈ ਦੱਸ ਦਈਏ ਕਿ ਸਾਬਕਾ ਡਿਪਲੋਮੈਟ ਅਨੈਮੀ ਪੌਲ ਪਿਛਲੇ ਸਾਲ ਅਕਤੂਬਰ ਵਿਚ ਗ੍ਰੀਨ ਪਾਰਟੀ ਦੀ ਲੀਡਰ ਬਣੀ ਸੀ। ਕੈਨੇਡਾ ਦੀ ਕਿਸੇ ਫ਼ੈਡਰਲ ਪਾਰਟੀ ਦੀ ਲੀਡਰ ਬਣਨ ਵਾਲੀ ਅਨੈਮੀ ਪਹਿਲੀ ਬਲੈਕ ਔਰਤ ਹੈ ।ਅਨੈਮੀ ਦੀ ਲੀਡਰਸ਼ਿਪ ਦੌਰਾਨ ਗ੍ਰੀਨ ਪਾਰਟੀ ਅੰਦਰੂਨੀ ਵਿਵਾਦਾਂ ਦਾ ਸਾਹਮਣਾ ਕਰਨਾ ਪਿਆ ।
2019 ਦੀਆਂ ਫ਼ੈਡਰਲ ਚੋਣਾਂ ਗ੍ਰੀਨ ਪਾਰਟੀ ਲਈ ਸਭ ਤੋਂ ਵੱਧ ਕਾਰਗਰ ਸਾਬਤ ਹੋਈਆਂ ਸਨ। ਅਨੈਮੀ ਪੌਲ ਵੱਲੋਂ ਕਲਾਇਮੇਂਟ ਚੇਂਜ ਦੇ ਮਾਮਲੇ ਵਿਚ ਠੋਸ ਕਦਮ ਉਠਾਉਣ ਅਤੇ ਨਸਲੀ ਵਿਤਕਰੇ ਦੇ ਖ਼ਾਤਮੇ ਲਈ ਜੋ ਵਾਅਦੇ ਨੇ ਕੀਤੇ ਉਨ੍ਹਾਂ ਨੇ ਅਨੈਮੀ ਪੌਲ ਦਾ ਨਾਂ ਗ੍ਰੀਨ ਲੀਡਰਸ਼ਿਪ ਉਮੀਦਵਾਰਾਂ ਦੀ ਸੂਚੀ ਵਿਚ ਪਹਿਲੇ ਨੰਬਰ ਤੇ ਲਿਆ ਦਿੱਤਾ ਸੀ।
2019 ਦੀਆਂ ਫ਼ੈਡਰਲ ਚੋਣਾਂ ਵਿਚ ਗ੍ਰੀਨ ਪਾਰਟੀ ਨੂੰ 1.1 ਮਿਲੀਅਨ ਵੋਟਾਂ ਪਈਆਂ ਸਨ ਯਾਨੀ ਪਾਰਟੀ ਦਾ ਨੈਸ਼ਨਲ ਵੋਟ ਸ਼ੇਅਰ 6.5 ਫ਼ੀਸਦੀ ਰਿਹਾ ਸੀ। ਪਰ ਪੌਲ ਦੀ ਲੀਡਰਸ਼ਿਪ ਅਧੀਨ, ਤਾਜ਼ਾ ਫ਼ੈਡਰਲ ਚੋਣਾਂ ਵਿਚ, ਗ੍ਰੀਨ ਪਾਰਟੀ ਨੂੰ 400,00 ਤੋਂ ਵੀ ਘੱਟ ਵੋਟਾਂ ਪਈਆਂ ਅਤੇ ਵੋਟ ਸ਼ੇਅਰ ਵੀ 2.3 ਫ਼ੀਸਦੀ ਰਹਿ ਗਿਆ ।

The post Green Party ਦੀ ਲੀਡਰ ਵੱਲੋਂ ਅਸਤੀਫ਼ਾ ਦੇਣ ਦਾ ਐਲਾਨ appeared first on TV Punjab | Punjabi News Channel.

Vancouver – ਲਿਬਰਲ ਪਾਰਟੀ ਦੇ ਨਵੇਂ ਚੁਣੇ ਐਮਪੀ ਜੌਰਜ ਚਾਹਲ ਖ਼ਿਲਾਫ਼ ਕੈਲਗਰੀ ਪੁਲਿਸ ਨੂੰ ਸ਼ਿਕਾਇਤ ਮਿਲੀ ਹੈ। ਇਸ ਤੋਂ ਬਾਅਦ ਹੁਣ ਪੁਲਿਸ ਵੱਲੋਂ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ। ਕੈਲਗਰੀ ਪੁਲਿਸ ਨੂੰ ਜੌਰਜ ਚਾਹਲ ਖ਼ਿਲਾਫ਼ ਸ਼ਿਕਾਇਤ ਮਿਲੀ ਹੈ ਕਿ ਉਨ੍ਹਾਂ ਵੱਲੋਂ ਆਪਣੇ ਵਿਰੋਧੀ ਉਮੀਦਵਾਰ ਦੇ ਕੈਂਪੇਨ ਫ਼ਲਾਇਰ ਨੂੰ ਹਟਾ ਕੇ ਆਪਣੇ ਚੋਣ ਫ਼ਲਾਇਰ ਲਗਾਏ ਗਏ। ਇਹ ਸਾਰਾ ਮਾਮਲਾ ਇੱਕ ਘਰ ਦੇ ਬਾਹਰ ਲੱਗੇ ਸਿਕਿਉਰਟੀ ਕੈਮਰੇ ਵਿਚ ਕੈਦ ਹੋ ਗਿਆ। ਇਸ ਸੰਬੰਧੀ ਹੁਣ ਪੁਲਿਸ ਦੇ ਐਂਟੀ-ਕੁਰਪਸ਼ਨ ਯੁਨਿਟ ਵੱਲੋਂ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।
ਇਸ ਬਾਰੇ ਚਾਹਲ ਦੇ ਕੈਂਪੇਨ ਮੈਨੇਜਰ ਨੇ ਬੋਲਦਿਆਂ ਕਿਹਾ ਹੈ ਕਿ ਸਹੋਤਾ ਦੀ ਚੋਣ ਸਮੱਗਰੀ ਇਸ ਲਈ ਹਟਾਈ ਗਈ ਕਿਉਂਕਿ ਉਸ ‘ਤੇ ਪੋਲਿੰਗ ਸਟੇਸ਼ਨ ਦੀ ਗਲਤ ਜਾਣਕਾਰੀ ਸੀ। ਫ਼ਿਲਹਾਲ ਉਨ੍ਹਾਂ ਨੇ ਇਸ ਮਾਮਲੇ ਦੀ ਪੁਲਿਸ ਵੱਲੋਂ ਜਾਂਚ ਕੀਤੇ ਜਾਣ ਬਾਰੇ ਟਿੱਪਣੀ ਨਹੀਂ ਕੀਤੀ ਹੈ।

ਦੱਸਦਈਏ ਕਿ ਜੌਰਜ ਚਾਹਲ ਵੱਲੋਂ ਫੈਡਰਲ ਚੋਣਾਂ ‘ਚ ਕੈਲਗਰੀ-ਸਕਾਈਵਿਊ ਰਾਇਡਿੰਗ ਤੋਂ ਜਿੱਤ ਹਾਸਿਲ ਕੀਤੀ। ਉਨ੍ਹਾਂ ਵੱਲੋਂ ਕੰਜ਼ਰਵੇਟਿਵ ਪਾਰਟੀ ਦੇ ਐਮ ਪੀ ਜੈਗ ਸਹੋਤਾ ਨੂੰ ਹਰਾਇਆ ਗਿਆ । ਪੂਰੇ ਐਲਬਰਟਾ ਸੂਬੇ ਵਿਚ ਦੋ ਰਾਇਡਿੰਗਜ਼ ਹੀ ਅਜਿਹੀਆਂ ਹਨ ਜਿਥੇ ਲਿਬਰਲ ਵੱਲੋਂ ਜਿੱਤ ਹਾਸਿਲ ਕੀਤੀ ਗਈ ਹੈ। ਇਸ ਦੇ ਨਾਲ ਹੀ ਕੈਲਗਰੀ ਇਲਾਕੇ ਦੀਆਂ 10 ਰਾਇਡਿੰਗਜ਼ ਵਿਚੋਂ ਸਿਰਫ ਇਕ ‘ਤੇ ਹੀ ਲਿਬਰਲ ਦੀ ਜਿੱਤ ਹੋਈ ਹੈ।

The post Canada : ਨਵਾਂ ਜਿੱਤਿਆ ਪੰਜਾਬੀ MP ਫਸਿਆ ਕਸੂਤਾ appeared first on TV Punjab | Punjabi News Channel.

Vancouver – ਕੈਨੇਡਾ ‘ਚ 20 ਸਤੰਬਰ ਨੂੰ ਫ਼ੈਡਰਲ ਚੋਣਾਂ ਹੋਣ ਜਾ ਰਹੀਆਂ ਹਨ। ਇਨ੍ਹਾਂ ਚੋਣਾਂ ਤੋਂ ਪਹਿਲਾਂ ਅੱਜ ਇਕ ਡਿਬੇਟ ਹੋਣ ਜਾ ਰਹੀ ਹੈ। ਇਸ ਦੌਰਾਨ ਸਿਆਸੀ ਲੀਡਰ ਆਹਮੋ -ਸਾਹਮਣੇ ਨਜ਼ਰ ਆਉਣਗੇ। ਇਸ ਡਿਬੇਟ ਵਾਸਤੇ ਸਿਆਸੀ ਪਾਰਟੀਆਂ ਦੇ ਲੀਡਰ ਅੱਜ ਓਟਵਾ ਪਹੁੰਚ ਰਹੇ ਹਨ। ਅੱਜ ਫ਼੍ਰੈਂਚ ਭਾਸ਼ਾ ਵਿਚ ਡਿਬੇਟ ਆਯੋਜਿਤ ਕੀਤੀ ਗਈ ਹੈ ਅਤੇ ਵੀਰਵਾਰ ਜਾਣੀ ਕੱਲ ਨੂੰ ਅੰਗ੍ਰੇਜ਼ੀ ਭਾਸ਼ਾ ਵਿਚ ਲੀਡਰਾਂ ਦੀ ਡਿਬੇਟ ਹੋਵੇਗੀ। ਇਸ ਡਿਬੇਟ ‘ਤੇ ਕੈਨੇਡਾ ਵਾਸੀਆਂ ਦੀਆਂ ਨਿਗਾਹਾਂ ਟਿਕੀਆਂ
ਹੋਇਆਂ ਹਨ।
ਅੱਜ 8 ਵਜੇ ET ਅਤੇ 5 ਵਜੇ PT , ਡਿਬੇਟ ਲਈ ਪੰਜ ਲੀਡਰ ਕਿਉਬੈਕ ਦੇ ਕਨੇਡੀਅਨ ਮਿਉਜ਼ੀਅਮ ਔਫ਼ ਹਿਸਟਰੀ ਵਿਚ ਸ਼ਾਮਲ ਹੋਣਗੇ। ਵੀਰਵਾਰ ਨੂੰ 9 ਵਜੇ ਅੰਗ੍ਰੇਜ਼ੀ ਭਾਸ਼ਾ ਵਿਚ ਲੀਡਰਾਂ ਦੀ ਡਿਬੇਟ ਹੋਵੇਗੀ। ਇਸ ਦੌਰਾਨ ਲਿਬਰਲ ਲੀਡਰ ਜਸਟਿਨ ਟਰੂਡੋ,ਕੰਜ਼ਰਵੇਟਿਵ ਲੀਡਰ ਐਰਿਨ ੳ’ਟੂਲ,ਐਨਡੀਪੀ ਲੀਡਰ ਜਗਮੀਤ ਸਿੰਘ,ਗ੍ਰੀਨ ਪਾਰਟੀ ਲੀਡਰ ਅਨੈਮੀ ਪੌਲ,ਬਲੌਕ ਕਿਉਬੈਕਵਾ ਲੀਡਰ ਈਵ ਫ਼੍ਰੈਂਸੁਆ ਬਲੌਂਸ਼ੇ ਇਹ ਲੀਡਰ ਆਹਮੋ ਸਾਹਮਣੇ ਨਜ਼ਰ ਆਉਣਗੇ।
ਸਿਆਸੀ ਮਾਹਿਰ ਵੀ ਆਪਣੇ ਵਿਚਾਰ ਇਸ ਸੰਬੰਧੀ ਪ੍ਰਗਟ ਕਰਦੇ ਨਜ਼ਰ ਆ ਰਹੇ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ 20 ਸਤੰਬਰ ਨੂੰ ਹੋਣ ਵਾਲੀਆਂ ਫ਼ੈਡਰਲ ਚੋਣਾਂ ਵਿਚ ਲੀਡਰਾਂ ਦੀ ਡਿਬੇਟ ਕਾਫ਼ੀ ਅਹਿਮ ਭੂਮਿਕਾ ਨਿਭਾ ਸਕਦੀ ਹੈ। ਉਨ੍ਹਾਂ ਮੁਤਾਬਿਕ ਇਹ ਲੀਡਰਾਂ ਦੀ ਡਿਬੇਟ ਬਹੁਤ ਮਹੱਤਵਪੂਰਨ ਹੋਵੇਗੀ।
ਦੱਸਦਈਏ ਕਿ ਸੀਬੀਸੀ ਦੇ ਪੋਲ ਟ੍ਰੈਕਰ ਦੇ ਮੁਤਾਬਿਕ ਨਾਲ ਕੰਜ਼ਰਵੇਟਿਵਜ਼ ਅਤੇ ਲਿਬਰਲਜ਼ ਵਿਚ ਫ਼ਸਵਾਂ ਮੁਕਾਬਲਾ ਦੇਖਿਆ ਜਾ ਰਿਹਾ ਹੈ। ਟ੍ਰੈਕਰ ਮੁਤਾਬਕ ਕੰਜ਼ਰਵੇਟਿਵਜ਼ ਨੂੰ ਵੱਧ ਵੋਟਰਾਂ ਦੀ ਸੁਪੋਰਟ ਮਿਲਦੀ ਨਜ਼ਰ ਆ ਰਹੀ ਹੈ ਪਰ ਵਧੇਰੇ ਸੀਟਾਂ ਲਿਬਲਰਾਂ ਦੀ ਝੋਲੀ ਪੈਂਦੀਆਂ ਦਿਖਾਈ ਦੇ ਰਹੀਆਂ ਹਨ। ਇਸੇ ਕਰਕੇ ਮੰਨਿਆ ਜਾ ਰਿਹਾ ਹੈ ਕਿ ਲੀਡਰਾਂ ਦੀ ਡਿਬੇਟ ਆਉਂਦੇ ਕੁਝ ਦਿਨਾਂ ਵਿਚ ਇਸ ਰੁਝਾਨ ਵਿਚ ਵੱਡਾ ਉਲਟ ਫ਼ੇਰ ਵੀ ਕਰ ਸਕਦੀ ਹੈ।

The post ਅੱਜ ਹੋਵੇਗੀ ਸਿਆਸੀ ਪਾਰਟੀਆਂ ਦੇ ਲੀਡਰਾਂ ਚ ਬਹਿਸ appeared first on TV Punjab | Punjabi News Channel.