VANCOUVER: ਪੰਜਾਬੀ ਗਾਇਕ ਏਪੀ ਢਿੱਲੋਂ ਦੇ ਕੈਨੇਡਾ ਸਥਿਤ ਘਰ ‘ਤੇ ਬਿਸ਼ਨੋਈ ਗੈਂਗ ਦੇ ਇਸ਼ਾਰੇ ‘ਤੇ ਗੋਲੀਬਾਰੀ ਅਤੇ ਅੱਗਜ਼ਨੀ ਕਰਨ ਦੇ ਦੋਸ਼ ਹੇਠ ਸਜ਼ਾ ਕੱਟ ਰਹੇ ਭਾਰਤੀ ਨਾਗਰਿਕ ਅਭਿਜੀਤ ਸਿੰਘ ਕਿੰਗਰਾ ਨੇ ਦਾਅਵਾ ਕੀਤਾ ਹੈ ਕਿ ਜੇਕਰ ਉਸ ਨੂੰ ਭਾਰਤ ਵਾਪਸ ਭੇਜਿਆ ਗਿਆ ਤਾਂ ਗੈਂਗ ਉਸ ਨੂੰ ਜਾਨੋਂ ਮਾਰ ਦੇਵੇਗਾ। ਬ੍ਰਿਟਿਸ਼ ਕੋਲੰਬੀਆ ਦੀ ਜੇਲ੍ਹ ਤੋਂ ਵੀਡੀਓ ਲਿੰਕ ਰਾਹੀਂ ਇਮੀਗ੍ਰੇਸ਼ਨ ਐਂਡ ਰੈਫਿਊਜੀ ਬੋਰਡ ਦੀ ਸੁਣਵਾਈ ਵਿੱਚ ਹਿੱਸਾ ਲੈਂਦਿਆਂ ਕਿੰਗਰਾ ਨੇ ਕਿਹਾ ਕਿ ਗੈਂਗ ਨੇ ਭਾਰਤ ਵਿੱਚ ਉਸ ਦੇ ਪਰਿਵਾਰ ਨੂੰ ਵੀ ਧਮਕੀਆਂ ਦਿੱਤੀਆਂ ਹਨ।

ਕੈਨੇਡਾ ਵਿੱਚ ਰਹਿੰਦੇ ਭਾਰਤੀ ਨਾਗਰਿਕਾਂ ਲਈ ਟੋਰੋਂਟੋ ਸਥਿਤ ਇੰਡੀਆ ਦੇ ਕੌਂਸਲੇਟ ਜਨਰਲ, ਵਲੋਂ ਐਡਵਾਇਜ਼ਰੀ ਜਾਰੀ ਕੀਤੀ ਗਈ ਹੈ । ਕੌਂਸਲੇਟ ਨੇ ਚੇਤਾਵਨੀ ਦਿੱਤੀ ਹੈ ਕਿ ਕੁੱਝ ਭਾਰਤੀ ਨਾਗਰਿਕਾਂ ਨੂੰ ਵੀਜ਼ਾ, ਪੀ ਆਰ, ਇਮੀਗ੍ਰੇਸ਼ਨ ਸਟੇਟਸ ਜਾਂ ਜੌਬ ਆਫਰਸ ਦੇ ਨਾਂ ਤੇ ਸਪੂਫੀਂਗ ਕਾਲਜ਼ ਆ ਰਹੀਆਂ ਹਨ, ਜਿੱਥੇ ਕਾਲਰ ਆਪਣੇ ਆਪ ਨੂੰ ਟੋਰੋਂਟੋ ਵਿੱਚ ਭਾਰਤੀ ਕੌਂਸਲੇਟ ਦਾ ਅਧਿਕਾਰੀ ਦੱਸਦੇ ਹਨ । ਕੌਂਸਲੇਟ ਨੇ ਸਾਫ ਕਿਹਾ ਕਿ ਉਹ ਕੈਨੇਡੀਅਨ ਵੀਜ਼ਾ, ਪੀ ਆਰ, ਇਮੀਗ੍ਰੇਸ਼ਨ ਸਟੇਟਸ ਤੇ ਜੌਬ ਆਫਰਜ਼ ਵਰਗੇ ਮਾਮਲਿਆਂ ਨਾਲ ਡੀਲ ਨਹੀਂ ਕਰਦੇ । ਐਡਵਾਇਜ਼ਰੀ ਮੁਤਾਬਿਕ, ਲੋਕਾਂ ਨੂੰ ਅਜਿਹੀਆਂ ਸ਼ੱਕੀ ਕਾਲਾਂ ਦਾ ਜਵਾਬ ਨਹੀਂ ਦੇਣਾ ਚਾਹੀਦਾ, ਨਾ ਆਪਣੀ ਨਿੱਜੀ ਜਾਣਕਾਰੀ ਦੇਣੀ ਚਾਹਿਦੀ ਅਤੇ ਨਾ ਹੀ ਪੈਸੇ ਟਰਾਂਸਫਰ ਕਰਨੇ ਚਾਹੀਦੇ ਹਨ ।

ਕੈਨੇਡਾ ਵਿੱਚ ਡਿਊਟੀ ਦੌਰਾਨ ਸ਼ਹੀਦ ਹੋਏ ਭਾਰਤੀ ਮੂਲ ਦੇ ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਦੇ ਕਾਂਸਟੇਬਲ ਤਰੁਣ ਬਾਲੀ ਨੂੰ ਪੂਰੇ ਸਰਕਾਰੀ ਸਨਮਾਨਾਂ ਨਾਲ ਅੰਤਿਮ ਵਿਦਾਈ ਦਿੱਤੀ ਗਈ। ਜਦੋਂ ਉਨ੍ਹਾਂ ਦੀ ਮ੍ਰਿਤਕ ਦੇਹ ਨੂੰ ਮੁੱਖ ਕੋਰੋਨਰ ਦਫ਼ਤਰ ਲਿਜਾਇਆ ਜਾ ਰਿਹਾ ਸੀ, ਤਾਂ ਗ੍ਰੇਟਰ ਟੋਰਾਂਟੋ ਏਰੀਆ ਅਤੇ ਵੱਖ-ਵੱਖ ਪੁਲਿਸ ਸੇਵਾਵਾਂ ਦੇ ਸੈਂਕੜੇ ਅਧਿਕਾਰੀਆਂ ਨੇ ਇਕੱਠੇ ਹੋ ਕੇ ਉਨ੍ਹਾਂ ਨੂੰ ‘ਗਾਰਡ ਆਫ਼ ਆਨਰ’ ਰਾਹੀਂ ਸਲਾਮੀ ਦਿੱਤੀ। 29 ਸਾਲਾ ਕਾਂਸਟੇਬਲ ਤਰੁਣ ਬਾਲੀ ਦੀ ਮੌਤ 9 ਜੂਨ ਨੂੰ ਉੱਤਰੀ ਓਨਟਾਰੀਓ ਦੇ ਹਰਸਟ ਇਲਾਕੇ ਵਿੱਚ ਡਿਊਟੀ ਦੌਰਾਨ ਹੋਈ ਸੀ। ਪੁਲਿਸ ਮੁਤਾਬਕ, ਇੱਕ ਜਾਂਚ ਅਭਿਆਨ ਦੌਰਾਨ ਇੱਕ 18 ਸਾਲਾ ਸ਼ੱਕੀ ਨੇ ਕਥਿਤ ਤੌਰ ‘ਤੇ ਆਪਣੀ ਗੱਡੀ ਨਾਲ ਪੁਲਿਸ ਦੇ ਘੇਰੇ ਨੂੰ ਟੱਕਰ ਮਾਰ ਦਿੱਤੀ ਸੀ।

ਕੈਨੇਡਾ ਦੀ ਲਿਬਰਲ ਸਰਕਾਰ ਨੇ ਦੇਸ਼ ਵਾਸੀਆਂ ਨੂੰ ਸਸਤੀਆਂ ਕੀਮਤਾਂ ‘ਤੇ ਸਥਾਨਕ ਪੱਧਰ ‘ਤੇ ਪੈਦਾ ਹੋਣ ਵਾਲੇ ਫਲ, ਸਬਜ਼ੀਆਂ ਅਤੇ ਹੋਰ ਤਾਜ਼ਾ ਵਸਤੂਆਂ ਮੁਹੱਈਆ ਕਰਵਾਉਣ ਦੇ ਉਦੇਸ਼ ਨਾਲ ਇੱਕ ‘ਨੈਸ਼ਨਲ ਫੂਡ ਸਕਿਓਰਿਟੀ ਸਟ੍ਰੈਟਿਜੀ’ ਦਾ ਐਲਾਨ ਕੀਤਾ ਹੈ। ਇਸ ਯੋਜਨਾ ਦਾ ਮਕਸਦ ਕੈਨੇਡਾ ਵਿੱਚ ਭੋਜਨ ਦੀ ਖਰੀਦ-ਵੇਚ, ਆਵਾਜਾਈ ਅਤੇ ਵੰਡ ਪ੍ਰਣਾਲੀ ਵਿੱਚ ਵੱਡਾ ਬਦਲਾਅ ਕਰਨਾ ਹੈ, ਤਾਂ ਜੋ ਕਿਸਾਨਾਂ, ਛੋਟੇ ਸੁਤੰਤਰ ਕਾਰੋਬਾਰੀਆਂ ਅਤੇ ਆਮ ਖਪਤਕਾਰਾਂ ਨੂੰ ਬਿਹਤਰ ਸਹਿਯੋਗ ਦਿੱਤਾ ਜਾ ਸਕੇ। ਸਰਕਾਰ ਮੁਤਾਬਕ ਇਸ ਰਣਨੀਤੀ ਦੇ ਤਹਿਤ ਅਗਲੇ 10 ਸਾਲਾਂ ਦੌਰਾਨ 3 ਬਿਲੀਅਨ ਡਾਲਰ ਤੋਂ ਵੱਧ ਦਾ ਨਿਵੇਸ਼ ਕੀਤਾ ਜਾਵੇਗਾ। ਇਸ ਯੋਜਨਾ ਵਿੱਚ ਫੂਡ ਟਰਮੀਨਲ ਅਤੇ ਹੱਬ ਵਰਗੇ ਬੁਨਿਆਦੀ ਢਾਂਚੇ ਲਈ 1 ਬਿਲੀਅਨ ਡਾਲਰ ਰੱਖੇ ਗਏ ਹਨ।

ਹੋਰ ਜਾਣਕਾਰੀ ਲਈ **TV Punjab** ਨਾਲ ਜੁੜੇ ਰਹੋ।

The post ਡਿਪੋਰਟ ਹੋਣ ਵਾਲੇ ਪੰਜਾਬੀਆਂ ਨੂੰ ਨਵਾਂ ਡਰ! CANADA NEWS appeared first on TV Punjab | Punjabi News Channel.

VANCOUVER: ਵਿਸ਼ਵ ਵਿਆਪੀ ਅਨਿਸ਼ਚਿਤਤਾ ਦੇ ਮੌਜੂਦਾ ਦੌਰ ਵਿੱਚੋਂ ਅਰਥਚਾਰੇ ਨੂੰ ਕੱਢਣ ਦੀ ਕੋਸ਼ਿਸ਼ ਦੇ ਤਹਿਤ, ਬੈਂਕ ਆਫ਼ ਕੈਨੇਡਾ ਨੇ ਆਪਣੀ ਮੁੱਖ ਵਿਆਜ ਦਰ ਵਿੱਚ ਕੋਈ ਬਦਲਾਅ ਨਾ ਕਰਨ ਦਾ ਫੈਸਲਾ ਕੀਤਾ ਹੈ। ਲਗਾਤਾਰ ਪੰਜਵੀਂ ਵਾਰ ਵਿਆਜ ਦਰ ਨੂੰ ਸਥਿਰ ਰੱਖਦੇ ਹੋਏ, ਕੇਂਦਰੀ ਬੈਂਕ ਨੇ ਅੱਜ ਆਪਣੀ ਪਾਲਿਸੀ ਦਰ ਨੂੰ 2.25 ਫੀਸਦੀ ‘ਤੇ ਬਰਕਰਾਰ ਰੱਖਿਆ ਹੈ। ਬੈਂਕ ਆਫ਼ ਕੈਨੇਡਾ ਦੇ ਗਵਰਨਰ ਟਿਫ ਮੈਕਲਮ ਨੇ ਆਪਣੇ ਤਿਆਰ ਕੀਤੇ ਬਿਆਨ ਵਿੱਚ ਕਿਹਾ ਕਿ ਸਾਲ ਦੀ ਪਹਿਲੀ ਤਿਮਾਹੀ ਦੌਰਾਨ ਦੇਸ਼ ਦੀ ਆਰਥਿਕਤਾ ਉਮੀਦ ਨਾਲੋਂ ਕਮਜ਼ੋਰ ਰਹੀ ਹੈ।

ਲੇਬਰ ਮਾਰਕਿਟ ਇੰਪੈਕਟ ਅਸੈਸਮੈਂਟ ਵਾਲੀਆਂ ਅਰਜ਼ੀਆਂ ਦੀ ਪ੍ਰੋਸੈਸਿੰਗ ਤੇਜ਼ ਕਰਦਿਆਂ ਕੈਨੇਡਾ ਸਰਕਾਰ ਮੌਜੂਦਾ ਵਰ੍ਹੇ ਦੌਰਾਨ 8,240 ਵਰਕਰਾਂ ਨੂੰ ਹਰੀ ਝੰਡੀ ਦੇ ਚੁੱਕੀ ਹੈ ਅਤੇ ਸਭ ਤੋਂ ਵੱਧ ਫਾਇਦਾ ਗਲੋਬਲ ਟੈਲੈਂਟ ਸਟ੍ਰੀਮ ਨਾਲ ਸਬੰਧਤ ਉਮੀਦਵਾਰਾਂ ਨੂੰ ਹੋਇਆ ਹੈ, ਜਿਨ੍ਹਾਂ ਨੂੰ ਸਿਰਫ਼ 8 ਦਿਨ ਦੇ ਅੰਦਰ ਐਲ.ਐਮ.ਆਈ.ਏ. ਜਾਰੀ ਕੀਤੇ ਜਾ ਰਹੇ ਹਨ। 2026 ਦੌਰਾਨ ਇੰਮੀਗ੍ਰੇਸ਼ਨ ਮਹਿਕਮੇ ਵੱਲੋਂ 60 ਹਜ਼ਾਰ ਆਰਜ਼ੀ ਵਿਦੇਸ਼ੀ ਕਾਮਿਆਂ ਨੂੰ ਕੈਨੇਡਾ ਸੱਦਣ ਦਾ ਟੀਚਾ ਮਿੱਥਿਆ ਗਿਆ ਹੈ, ਜੋ ਪਿਛਲੇ ਵਰ੍ਹੇ ਦੇ ਮੁਕਾਬਲੇ 31 ਫ਼ੀਸਦੀ ਘੱਟ ਬਣਦਾ ਹੈ ਜਦੋਂ 82 ਹਜ਼ਾਰ ਕਾਮਿਆਂ ਨੂੰ ਕੈਨੇਡਾ ਆਉਣ ਦੀ ਇਜਾਜ਼ਤ ਦਿਤੀ ਗਈ ਸੀ।

ਕੈਨੇਡਾ ਵਿੱਚ ਇੱਕ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇੱਕ ਸਾਬਕਾ ਏਅਰਲਾਈਨ ਪਾਇਲਟ ਨੂੰ ਕਥਿਤ ਤੌਰ ‘ਤੇ ਲਗਭਗ 17 ਸਾਲਾਂ ਤੱਕ ਬਿਨਾਂ ਯੋਗ ਲਾਇਸੰਸ ਦੇ ਸੈਂਕੜੇ ਉਡਾਣਾਂ ਭਰਨ ਦੇ ਦੋਸ਼ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਓਨਟਾਰੀਓ ਦੀ ਪੀਲ ਰੀਜਨਲ ਪੁਲਿਸ ਨੇ ਚਾਰ ਮਹੀਨਿਆਂ ਦੀ ਜਾਂਚ ਤੋਂ ਬਾਅਦ ਏਅਰ ਕੈਨੇਡਾ ਦੇ ਸਾਬਕਾ ਕੈਪਟਨ ਜੈਫਰੀ ਵਾਲ ‘ਤੇ ਧੋਖਾਧੜੀ ਸਮੇਤ ਕਈ ਹੋਰ ਗੰਭੀਰ ਦੋਸ਼ ਲਗਾਏ ਹਨ। ਪੁਲਿਸ ਮੁਤਾਬਕ, ਜੈਫਰੀ ਵਾਲ ਨੇ ਸਾਲ 2009 ਤੋਂ 2025 ਦਰਮਿਆਨ ਜਾਅਲੀ ਪਾਇਲਟ ਲਾਇਸੰਸਾਂ ਦੀ ਵਰਤੋਂ ਕਰਕੇ 900 ਤੋਂ ਵੱਧ ਘਰੇਲੂ ਅਤੇ ਅੰਤਰਰਾਸ਼ਟਰੀ ਉਡਾਣਾਂ ਦਾ ਸੰਚਾਲਨ ਕੀਤਾ।

ਕੈਨੇਡਾ-ਅਮਰੀਕਾ ਦੇ ਬਾਰਡਰ ’ਤੇ 40 ਕਿਲੋ ਕੋਕੀਨ ਸਣੇ ਫੜੇ ਗਏ ਪੰਜਾਬੀ ਟਰੱਕ ਡਰਾਈਵਰ ਨੇ ਦੋਸ਼ ਕਬੂਲ ਕਰਨ ਤੋਂ ਨਾਂਹ ਕਰ ਦਿਤੀ ਹੈ ਅਤੇ ਹੁਣ ਸਰਕਾਰੀ ਵਕੀਲਾਂ ਨੂੰ ਸਬੂਤਾਂ ਦੇ ਆਧਾਰ ’ਤੇ ਦੋਸ਼ ਸਾਬਤ ਕਰਨੇ ਹੋਣਗੇ। ਬਲੂ ਵਾਟਰ ਬ੍ਰਿਜ ’ਤੇ ਟ੍ਰਾਂਸਪੋਰਟ ਟਰੱਕ ਵਿਚੋਂ ਹੋਈ ਬਰਾਮਦਗੀ ਬਾਰੇ ਸਾਰਨੀਆ ਦੀ ਅਦਾਲਤ ਨੂੰ ਦੱਸਿਆ ਗਿਆ ਕਿ 26 ਅਪ੍ਰੈਲ 2024 ਨੂੰ 33 ਸਾਲਾ ਰਣਜੀਤ ਸਿੰਘ, ਅਮਰੀਕਾ ਤੋਂ ਕੈਨੇਡਾ ਦਾਖ਼ਲ ਹੋ ਰਿਹਾ ਸੀ, ਜਦੋਂ ਸੀ.ਬੀ.ਐਸ.ਏ. ਵਾਲਿਆਂ ਨੇ ਉਸ ਨੂੰ ਰੋਕਿਆ। ਮੁਢਲੀ ਪੜਤਾਲ ਮਗਰੋਂ ਸਨਿਫ਼ਰ ਡੌਗ ਰਾਹੀਂ ਟਰੱਕ ਦੀ ਤਲਾਸ਼ੀ ਲੈਣ ਦਾ ਫ਼ੈਸਲਾ ਲਿਆ ਗਿਆ ਅਤੇ ਇਸ ਕਾਰਵਾਈ ਦੌਰਾਨ ਗੱਤੇ ਦੇ ਡੱਬਿਆਂ ਵਿਚ ਬੰਦ ਚਿੱਟੇ ਰੰਗ ਦਾ ਪਾਊਡਰ ਬਰਾਮਦ ਹੋਇਆ ਜੋ ਕੋਕੀਨ ਸਾਬਤ ਹੋ ਗਿਆ।

ਪੌਪ ਸਟਾਰ ਕੇਟੀ ਪੈਰੀ ਅਤੇ ਕੈਨੇਡਾ ਦੇ ਸਾਬਕਾ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਨਿਊਯਾਰਕ ਦੇ ਟ੍ਰਾਈਬੇਕਾ ਫਿਲਮ ਫੈਸਟੀਵਲ ਵਿੱਚ ਇੱਕਠੇ ਰੈੱਡ ਕਾਰਪੇਟ ‘ਤੇ ਕਦਮ ਰੱਖ ਕੇ ਆਪਣੇ ਰਿਸ਼ਤੇ ਨੂੰ ਜਨਤਕ ਕਰ ਦਿੱਤਾ ਹੈ। ਕੇਟੀ ਪੈਰੀ ਦੀ ਕੰਸਰਟ ਫਿਲਮ ‘Katy Perry: The Lifetimes Tour – Live from Paris’ ਦੇ ਪ੍ਰੀਮੀਅਰ ਦੌਰਾਨ ਇਹ ਜੋੜਾ ਕੈਮਰਿਆਂ ਸਾਹਮਣੇ ਮੁਸਕਰਾਉਂਦਾ ਅਤੇ ਇੱਕ-ਦੂਜੇ ਦੇ ਬੇਹੱਦ ਕਰੀਬ ਨਜ਼ਰ ਆਇਆ। ਰੈੱਡ ਕਾਰਪੇਟ ‘ਤੇ ਕੇਟੀ ਪੈਰੀ ਨੇ ਚਿੱਟੇ ਰੰਗ ਦਾ ਖੂਬਸੂਰਤ ਗਾਊਨ ਪਾਇਆ ਹੋਇਆ ਸੀ, ਜਦੋਂ ਕਿ ਟਰੂਡੋ ਬਲੈਕ ਸੂਟ ਅਤੇ ਵਾਈਟ ਸ਼ਰਟ ਵਿੱਚ ਕਲਾਸਿਕ ਲੁੱਕ ‘ਚ ਨਜ਼ਰ ਆਏ। ਇਸ ਦੌਰਾਨ ਟਰੂਡੋ ਆਪਣੀ ਪ੍ਰੇਮਿਕਾ ਦੀ ਤਾਰੀਫ ਕਰਨੋਂ ਖੁਦ ਨੂੰ ਰੋਕ ਨਹੀਂ ਸਕੇ।

ਹੋਰ ਜਾਣਕਾਰੀ ਲਈ **TV Punjab** ਨਾਲ ਜੁੜੇ ਰਹੋ।

The post ਕੈਨੇਡਾ ਨੂੰ ਪੈ ਗਈ ਵਰਕਰਾਂ ਦੀ ਲੋੜ! ਫਟਾਫਟ ਦੇ ਰਹੇ ਵੀਜ਼ਾ! CANADA NEWS appeared first on TV Punjab | Punjabi News Channel.

VANCOUVER: ਬੀਤੇ ਮਹੀਨੇ ਸਰੀ ਦੇ ਇੱਕ ਦਫ਼ਤਰ ਵਿੱਚ ਦਿਨ-ਦਿਹਾੜੇ ਗੋਲੀਆਂ ਮਾਰ ਕੇ ਕਤਲ ਕੀਤੇ ਗਏ ਵਿਅਕਤੀ ਦੀ ਪਛਾਣ ਗੁਰਵਿਕਰਮਜੀਤ ਸਿੰਘ ਵੜਿੰਗ ਵਜੋਂ ਹੋਈ ਹੈ। ਮੀਡੀਆ ਇਨਵੈਸਟੀਗੇਸ਼ਨ ‘ਦ ਫਿਫਥ ਅਸਟੇਟ’ ਮੁਤਾਬਕ, 35 ਸਾਲਾ ਵੜਿੰਗ ਭਾਰਤ ਦੇ ਖ਼ਤਰਨਾਕ ਲਾਰੈਂਸ ਬਿਸ਼ਨੋਈ ਗੈਂਗ ਦਾ ਕੈਨੇਡਾ ਵਿੱਚ “ਮੁੱਖ ਹੈਂਡਲਰ” ਸੀ ਅਤੇ ਉਸ ਦੇ ਕ੍ਰਿਕਟ ਫਿਕਸਿੰਗ ਨਾਲ ਵੀ ਕਥਿਤ ਸਬੰਧ ਸਨ। ਇਹ ਵਾਰਦਾਤ 4 ਮਈ ਨੂੰ ਦੁਪਹਿਰ ਵੇਲੇ ਵੈਨਕੂਵਰ ਸਕੂਲ ਆਫ਼ ਮੈਨੇਜਮੈਂਟ ਦੀ ਇਮਾਰਤ ਵਿੱਚ ਵਾਪਰੀ, ਜਿੱਥੇ ਹਮਲਾਵਰ ਆਰਾਮ ਨਾਲ ਅੰਦਰ ਆਏ, ਵੜਿੰਗ ਨੂੰ ਗੋਲੀ ਮਾਰੀ ਅਤੇ ਫ਼ਰਾਰ ਹੋ ਗਏ।

ਕੈਨੇਡਾ ਦੀ ਫੈਡਰਲ ਸਰਕਾਰ ਇਸੇ ਬੁੱਧਵਾਰ ਨੂੰ ਪੇਸ਼ ਕੀਤੇ ਜਾਣ ਵਾਲੇ ‘ਔਨਲਾਈਨ ਹਾਰਮਸ ਬਿੱਲ’ ਦੇ ਹਿੱਸੇ ਵਜੋਂ 16 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਲਈ ਸੋਸ਼ਲ ਮੀਡੀਆ ਦੀ ਵਰਤੋਂ ‘ਤੇ ਪਾਬੰਦੀ ਲਗਾਉਣ ਦੀ ਯੋਜਨਾ ਬਣਾ ਰਹੀ ਹੈ। ਕੈਨੇਡੀਅਨ ਮੀਡੀਆ ਨੂੰ ਇੱਕ ਸਰਕਾਰੀ ਸੂਤਰ ਨੇ ਆਪਣਾ ਨਾਮ ਗੁਪਤ ਰੱਖਣ ਦੀ ਸ਼ਰਤ ‘ਤੇ ਇਸ ਦੀ ਪੁਸ਼ਟੀ ਕੀਤੀ ਹੈ। ਹਾਲਾਂਕਿ, ਸੱਭਿਆਚਾਰ ਮੰਤਰੀ ਮਾਰਕ ਮਿਲਰ ਨੇ ਬਿੱਲ ਦੇ ਹਾਊਸ ਆਫ਼ ਕਾਮਨਜ਼ ਵਿੱਚ ਪੇਸ਼ ਹੋਣ ਤੱਕ ਇਸ ‘ਤੇ ਕੋਈ ਵੀ ਟਿੱਪਣੀ ਕਰਨ ਤੋਂ ਇਨਕਾਰ ਕਰ ਦਿੱਤਾ ਹੈ। ਜੇਕਰ ਇਹ ਬਿੱਲ ਪਾਸ ਹੁੰਦਾ ਹੈ, ਤਾਂ ਕੈਨੇਡਾ ਅਜਿਹਾ ਕਦਮ ਚੁੱਕਣ ਵਾਲੇ ਆਸਟ੍ਰੇਲੀਆ ਅਤੇ ਮਲੇਸ਼ੀਆ ਵਰਗੇ ਦੇਸ਼ਾਂ ਦੀ ਸੂਚੀ ਵਿੱਚ ਸ਼ਾਮਲ ਹੋ ਜਾਵੇਗਾ।

ਮਿਡਲ ਈਸਟ ਵਿੱਚ ਚੱਲ ਰਹੀ ਜੰਗ ਕਾਰਨ ਤੇਲ ਦੀਆਂ ਅਸਮਾਨੀ ਚੜ੍ਹੀਆਂ ਕੀਮਤਾਂ ਤੋਂ ਪ੍ਰੇਸ਼ਾਨ ਕੈਨੇਡੀਅਨ ਏਅਰਲਾਈਨਾਂ ਨੂੰ ਰਾਹਤ ਦੇਣ ਲਈ ਫੈਡਰਲ ਸਰਕਾਰ ਨੇ ਇੱਕ ਨਵੇਂ ਕਰਜ਼ਾ ਪ੍ਰੋਗਰਾਮ ਦਾ ਐਲਾਨ ਕੀਤਾ ਹੈ। ਇਸ ਯੋਜਨਾ ਤਹਿਤ ਪ੍ਰਭਾਵਿਤ ਏਅਰਲਾਈਨਾਂ 15 ਕਰੋੜ ਡਾਲਰ ਤੱਕ ਦਾ ਕਰਜ਼ਾ ਲੈ ਸਕਣਗੀਆਂ। ਵਿੱਤ ਮੰਤਰੀ ਫਰਾਂਸਿਸ-ਫਿਲਿਪ ਸ਼ੈਂਪੇਨ ਨੇ ਕਿਹਾ ਕਿ ਇਸ ਆਰਜ਼ੀ ਸਹਾਇਤਾ ਦਾ ਉਦੇਸ਼ ਯਾਤਰੀਆਂ ਲਈ ਹਵਾਈ ਸਫ਼ਰ ਨੂੰ ਕਿਫ਼ਾਇਤੀ ਬਣਾਉਣਾ, ਰੁਜ਼ਗਾਰ ਦੀ ਰੱਖਿਆ ਕਰਨਾ ਅਤੇ ਦੇਸ਼ ਵਿੱਚ ਹਵਾਈ ਸੰਪਰਕ ਨੂੰ ਬਣਾਈ ਰੱਖਣਾ ਹੈ।

ਓਨਟਾਰੀਓ ਦੇ ਕਿਚਨਰ ਸ਼ਹਿਰ ਵਿੱਚ ਇੱਕ ਜਰਮਨ ਸ਼ੈਫਰਡ ਨਸਲ ਦੇ ਕੁੱਤੇ ‘ਡਿਊਕ’ ਨੂੰ ਆਪਣੀ ਮਾਲਕਣ ਅਤੇ ਉਸਦੇ ਪਰਿਵਾਰ ਦੀ ਜਾਨ ਬਚਾਉਣ ਲਈ ਹੀਰੋ ਮੰਨਿਆ ਜਾ ਰਿਹਾ ਹੈ। ਲੰਘੀ 31 ਮਈ ਦੀ ਰਾਤ ਅਹਰੇਨਸ ਸਟ੍ਰੀਟ ਵੈਸਟ ਸਥਿਤ ਇੱਕ ਘਰ ਵਿੱਚ ਭਿਆਨਕ ਅੱਗ ਲੱਗ ਗਈ, ਜਿਸ ਨੇ ਪੂਰੇ ਘਰ ਅਤੇ ਬਾਹਰ ਖੜ੍ਹੇ ਤਿੰਨ ਵਾਹਨਾਂ ਨੂੰ ਸੁਆਹ ਕਰ ਦਿੱਤਾ। ਘਰ ਦੀ ਮਾਲਕਣ ਨੈਂਸੀ ਐਲਿਸ ਉਸ ਵੇਲੇ ਸੁੱਤੀ ਹੋਈ ਸੀ, ਜਦੋਂ ਡਿਊਕ ਨੇ ਖ਼ਤਰੇ ਨੂੰ ਪਛਾਣ ਲਿਆ। ਐਲਿਸ ਨੇ ਦੱਸਿਆ ਕਿ ਡਿਊਕ ਨੇ ਮੇਰੇ ਵਾਲ ਖਿੱਚ ਕੇ ਅਤੇ ਬੁਰੀ ਤਰ੍ਹਾਂ ਕੰਬਦੇ ਅਤੇ ਭੌਂਕਦੇ ਹੋਏ ਮੈਨੂੰ ਜਗਾਇਆ।

ਹੋਰ ਜਾਣਕਾਰੀ ਲਈ **TV Punjab** ਨਾਲ ਜੁੜੇ ਰਹੋ।

The post ਕੈਨੇਡਾ ‘ਚ ਕੁੱਤੇ ਨੇ ਬਚਾਈ ਪਰਿਵਾਰ ਦੀ ਜਾਨ! CANADA NEWS appeared first on TV Punjab | Punjabi News Channel.

VANCOUVER: ਕੈਨੇਡਾ ਵਿੱਚ ਭਾਰਤੀ ਮੂਲ ਦੇ ਨੌਜਵਾਨ ਕ੍ਰਿਕਟ ਖਿਡਾਰੀਆਂ ਵੱਲੋਂ ਇੱਕ ਅਣਜਾਣ ਲੜਕੀ ਦੀ ਮਦਦ ਕਰਨ ਦੀ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ, ਜਿਸ ਕਾਰਨ ਇਨ੍ਹਾਂ ਨੌਜਵਾਨਾਂ ਦੀ ਹਰ ਪਾਸੇ ਕਾਫ਼ੀ ਸ਼ਲਾਘਾ ਕੀਤੀ ਜਾ ਰਹੀ ਹੈ। ਇਹ ਘਟਨਾ ਬ੍ਰਿਟਿਸ਼ ਕੋਲੰਬੀਆ ਦੇ ‘ਪ੍ਰਿੰਸ ਜਾਰਜ ਕ੍ਰਿਕਟ ਕਲੱਬ’ ਦੇ ਖਿਡਾਰੀਆਂ ਨਾਲ ਜੁੜੀ ਹੋਈ ਹੈ।

ਕੈਨੇਡਾ ਦੇ ਅਲਬਰਟਾ ਸੂਬੇ ਨੂੰ ਵੱਖਰਾ ਮੁਲਕ ਬਣਾਉਣ ਦਾ ਪ੍ਰਚਾਰ ਭਾਰਤ, ਪਾਕਿਸਤਾਨ ਅਤੇ ਇੰਡੋਨੇਸ਼ੀਆ ਨਾਲ ਸਬੰਧਤ 14 ਫੇਸਬੁੱਕ ਖਾਤਿਆਂ ਤੋਂ ਵੱਡੇ ਪੱਧਰ ’ਤੇ ਕੀਤਾ ਜਾ ਰਿਹਾ ਹੈ ਅਤੇ ਇਸ ਤੋਂ ਵੀ ਹੈਰਾਨਕੁੰਨ ਤੱਥ ਇਹ ਹੈ ਕਿ ਮੈਟਾ ਇਨ੍ਹਾਂ ਖਾਤਿਆਂ ਦੇ ਮਾਲਕਾਂ ਨੂੰ ਅਦਾਇਗੀ ਕਰ ਰਹੀ ਹੈ। ਮੀਡੀਆ ਰਿਪੋਰਟ ਮੁਤਾਬਕ ਅਲਬਰਟਾ ਦੇ ਵੱਖ ਹੋਣ ਦੀ ਹਮਾਇਤ ਕਰਨ ਵਾਲੀ ਨੀਤਾ ਅਕੀਲਾ ਨੇ ਕਿਹਾ ਕਿ ਉਸ ਨੇ ਆਜ਼ਾਦੀ ਵਾਲੀ ਪਟੀਸ਼ਨ ’ਤੇ ਦਸਤਖ਼ਤ ਕੀਤੇ ਕਿਉਂਕਿ ਹੁਣ ਕੈਨੇਡਾ ਮਹਾਨ ਮੁਲਕ ਨਹੀਂ ਰਹਿ ਗਿਆ। ਨੀਤਾ ਅਕੀਲਾ ਉਸ ਫੇਸਬੁੱਕ ਅਕਾਊਂਟ ਨੂੰ ਫੌਲੋ ਵੀ ਕਰਦੀ ਹੈ, ਜਿਸ ਦੇ ਇਕ ਲੱਖ ਤੋਂ ਵੱਧ ਮੈਂਬਰ ਹਨ ਅਤੇ ਅਲਬਰਟਾ ਦੀ ਆਜ਼ਾਦੀ ਦਾ ਵਧ ਚੜ੍ਹ ਕੇ ਪ੍ਰਚਾਰ ਇਸ ਰਾਹੀਂ ਕੀਤਾ ਜਾਂਦਾ ਹੈ।

ਅਲਬਰਟਾ ਸਰਕਾਰ ਵੱਲੋਂ ਸਟੂਡੈਂਟ ਲੋਨ ਪ੍ਰੋਗਰਾਮ ਵਿੱਚ ਕੀਤੇ ਗਏ ਹਾਲੀਆ ਬਦਲਾਅ ਸੂਬੇ ਦੇ ਬਹੁਤ ਸਾਰੇ ਵਿਦਿਆਰਥੀਆਂ ਲਈ ਮੁਸ਼ਕਲਾਂ ਖੜ੍ਹੀਆਂ ਕਰ ਸਕਦੇ ਹਨ। ਨਵੇਂ ਅਕਾਦਮਿਕ ਸਾਲ ਲਈ, ਵਿਦਿਆਰਥੀਆਂ ਨੂੰ ਹੁਣ ਲੋਨ ਲੈਣ ਲਈ ਪਹਿਲਾਂ ਦੇ ਮੁਕਾਬਲੇ ਦੁੱਗਣਾ ਯੋਗਦਾਨ ਪਾਉਣਾ ਪਵੇਗਾ, ਯਾਨੀ ਘੱਟੋ-ਘੱਟ ਯੋਗਦਾਨ 1,500 ਡਾਲਰ ਤੋਂ ਵਧਾ ਕੇ 3,000 ਡਾਲਰ ਪ੍ਰਤੀ ਲੋਨ ਸਾਲ ਕਰ ਦਿੱਤਾ ਗਿਆ ਹੈ। ਇਸ ਤੋਂ ਇਲਾਵਾ, ਲੋਨ ਦੀ ਯੋਗਤਾ ਤੈਅ ਕਰਨ ਲਈ ਹੁਣ ਮਾਪਿਆਂ ਅਤੇ ਜੀਵਨ ਸਾਥੀ ਦੀ ਆਮਦਨ ਦਾ ਵੀ ਮੁਲਾਂਕਣ ਕੀਤਾ ਜਾਵੇਗਾ। ਮਾਊਂਟ ਰਾਇਲ ਯੂਨੀਵਰਸਿਟੀ ਦੇ ਸਟੂਡੈਂਟਸ ਐਸੋਸੀਏਸ਼ਨ ਦੇ ਪ੍ਰਧਾਨ ਨੋਏਲ ਓਰਮਿਟਾ ਨੇ ਕਿਹਾ ਕਿ ਇਹ ਬਦਲਾਅ ਵਿਦਿਆਰਥੀਆਂ ਦੀ ਪੜ੍ਹਾਈ ਵਿੱਚ ਇੱਕ ਹੋਰ ਵੱਡੀ ਆਰਥਿਕ ਰੁਕਾਵਟ ਬਣੇਗਾ।

‘ਸਪੋਰਟਸ ਇਲਸਟ੍ਰੇਟਿਡ’ ਮੈਗਜ਼ੀਨ ਵੱਲੋਂ ਜਾਰੀ ਕੀਤੀ ਗਈ ਤਾਜ਼ਾ ਸੂਚੀ ਵਿੱਚ ਵੈਨਕੂਵਰ ਨੂੰ ਵਰਲਡ ਕੱਪ ਮੈਚਾਂ ਦੀ ਮੇਜ਼ਬਾਨੀ ਕਰਨ ਵਾਲੇ 16 ਸ਼ਹਿਰਾਂ ਵਿੱਚੋਂ ਸਭ ਤੋਂ ਸਰਵੋਤਮ ਚੁਣਿਆ ਗਿਆ ਹੈ। ਮੈਗਜ਼ੀਨ ਨੇ ਇਸਦਾ ਮੁੱਖ ਕਾਰਨ ਵੈਨਕੁਵਰ ਦੀ ਸ਼ਾਨਦਾਰ ਆਵਾਜਾਈ ਪ੍ਰਣਾਲੀ, ਪੈਦਲ ਚੱਲਣ ਯੋਗ ਰਸਤੇ ਅਤੇ ਖੁਸ਼ਗਵਾਰ ਮੌਸਮ ਨੂੰ ਦੱਸਿਆ ਹੈ। ਕੈਨੇਡਾ ਦੇ ਦੋਵੇਂ ਮੇਜ਼ਬਾਨ ਸ਼ਹਿਰਾਂ ਨੇ ਇਸ ਸੂਚੀ ਵਿੱਚ ਬਿਹਤਰ ਪ੍ਰਦਰਸ਼ਨ ਕੀਤਾ ਹੈ, ਜਿੱਥੇ ਟੋਰਾਂਟੋ ਨੂੰ ਸੀਏਟਲ ਤੋਂ ਬਾਅਦ ਤੀਜਾ ਸਥਾਨ ਹਾਸਲ ਹੋਇਆ ਹੈ।

ਕੈਨੇਡੀਅਨ ਆਰਥਿਕਤਾ ਵਿੱਚ ਸੁਸਤੀ ਅਤੇ ਵਪਾਰਕ ਅਨਿਸ਼ਚਿਤਤਾ ਦੇ ਮੱਦੇਨਜ਼ਰ, ਬੈਂਕ ਆਫ਼ ਕੈਨੇਡਾ ਵੱਲੋਂ ਇਸ ਹਫ਼ਤੇ ਵਿਆਜ ਦਰਾਂ ਨੂੰ 2.25 ਫੀਸਦੀ ‘ਤੇ ਸਥਿਰ ਰੱਖਣ ਦੀ ਉਮੀਦ ਹੈ। ਮੱਧ ਪੂਰਬ ਵਿੱਚ ਜੰਗ ਕਾਰਨ ਤੇਲ ਦੀਆਂ ਕੀਮਤਾਂ ਵਧਣ ਨਾਲ ਮਹਿੰਗਾਈ ਬੈਂਕ ਦੇ ਉਪਰਲੇ ਟਾਰਗੇਟ ਤੱਕ ਪਹੁੰਚ ਗਈ ਹੈ, ਜਦੋਂ ਕਿ ਸਰਦੀਆਂ ਅਤੇ ਬਸੰਤ ਦੌਰਾਨ ਆਰਥਿਕ ਵਿਕਾਸ ਰੁਕਣ ਕਾਰਨ ਮੰਦੀ ਦਾ ਡਰ ਪੈਦਾ ਹੋ ਗਿਆ ਹੈ।

ਹੋਰ ਜਾਣਕਾਰੀ ਲਈ **TV Punjab** ਨਾਲ ਜੁੜੇ ਰਹੋ।

The post ਕੈਨੇਡਾ ‘ਚ ਭਾਰਤੀ ਕ੍ਰਿਕਟਰਾਂ ਨੇ ਬਚਾਈ ਅਣਜਾਣ ਕੁੜੀ ਦੀ ਇੱਜਤ! CANADA NEWS appeared first on TV Punjab | Punjabi News Channel.

ਸਟੈਟਿਸਟਿਕਸ ਕੈਨੇਡਾ ਵੱਲੋਂ ਜਾਰੀ ਤਾਜ਼ਾ ਅੰਕੜਿਆਂ ਮੁਤਾਬਕ, ਕੈਨੇਡੀਅਨ ਆਰਥਿਕਤਾ ਵਿੱਚ ਮਈ ਮਹੀਨੇ ਦੌਰਾਨ ਇੱਕ ਵੱਡਾ ਅਤੇ ਹੈਰਾਨੀਜਨਕ ਬਦਲਾਅ ਦੇਖਣ ਨੂੰ ਮਿਲਿਆ ਹੈ। ਦੇਸ਼ ਵਿੱਚ ਪਿਛਲੇ ਮਹੀਨੇ 88,000 ਨਵੀਆਂ ਨੌਕਰੀਆਂ ਦਾ ਵਾਧਾ ਹੋਇਆ ਹੈ। ਇਸ ਵੱਡੀ ਰਾਹਤ ਨੇ ਸਾਲ ਦੀ ਸ਼ੁਰੂਆਤ ਤੋਂ ਰੁਜ਼ਗਾਰ ਵਿੱਚ ਆ ਰਹੀ ਲਗਾਤਾਰ ਗਿਰਾਵਟ ਦੇ ਅਸਰ ਨੂੰ ਕਾਫੀ ਹੱਦ ਤੱਕ ਘੱਟ ਕਰ ਦਿੱਤਾ ਹੈ। ਇਸ ਸੁਧਾਰ ਦੇ ਨਾਲ ਹੀ ਦੇਸ਼ ਵਿੱਚ ਬੇਰੁਜ਼ਗਾਰੀ ਦੀ ਦਰ ਵੀ ਹੇਠਾਂ ਆਈ ਹੈ। ਏਜੰਸੀ ਮੁਤਾਬਕ ਹੁਣ ਬੇਰੁਜ਼ਗਾਰੀ ਦਰ ਘਟ ਕੇ 6.6 ਫੀਸਦੀ ਰਹਿ ਗਈ ਹੈ, ਜੋ ਕਿ ਅਪ੍ਰੈਲ ਮਹੀਨੇ ਵਿੱਚ 6.9 ਫੀਸਦੀ ਦਰਜ ਕੀਤੀ ਗਈ ਸੀ।

ਕੈਨੇਡਾ ਦੇ ਸੂਬੇ ਅਲਬਰਟਾ ਨੂੰ ਇੱਕ ਵੱਖਰਾ ਦੇਸ਼ ਬਣਾਉਣ ਦੀ ਮੰਗ ਸਬੰਧੀ 19 ਅਕਤੂਬਰ ਨੂੰ ਹੋਣ ਵਾਲੇ ਰੈਫਰੈਂਡਮ ਤੋਂ ਪਹਿਲਾਂ ਨਾਗਰਿਕਤਾ ਅਤੇ ਪਾਸਪੋਰਟ ਦਾ ਮੁੱਦਾ ਕਾਫ਼ੀ ਭੱਖ ਗਿਆ ਹੈ। ਵੱਖਵਾਦੀ ਨੇਤਾਵਾਂ ਅਤੇ ਸੰਗਠਨਾਂ ਦਾ ਦਾਅਵਾ ਹੈ ਕਿ ਕੈਨੇਡਾ ਤੋਂ ਵੱਖ ਹੋਣ ਤੋਂ ਬਾਅਦ ਵੀ ਇੱਥੋਂ ਦੇ ਲੋਕਾਂ ਕੋਲ ਕੈਨੇਡੀਅਨ ਪਾਸਪੋਰਟ ਰਹੇਗਾ, ਪਰ ਸੰਵਿਧਾਨਕ ਮਾਹਰਾਂ ਨੇ ਇਸ ਦਾਅਵੇ ਨੂੰ ਪੂਰੀ ਤਰ੍ਹਾਂ ਨਕਾਰ ਦਿੱਤਾ ਹੈ। ਅਲਬਰਟਾ ਨੂੰ ਵੱਖਰਾ ਦੇਸ਼ ਬਣਾਉਣ ਦੀ ਵਕਾਲਤ ਕਰਨ ਵਾਲੇ ਪ੍ਰਮੁੱਖ ਗਰੁੱਪ ‘ਅਲਬਰਟਾ ਪ੍ਰਾਸਪੈਰਿਟੀ ਪ੍ਰੋਜੈਕਟ’ ਨੇ ਆਪਣੀ ਵੈੱਬਸਾਈਟ ‘ਤੇ ਦਾਅਵਾ ਕੀਤਾ ਹੈ ਕਿ ਜਦੋਂ ਤੱਕ ਕਾਨੂੰਨ ਨਹੀਂ ਬਦਲਦੇ, ਆਜ਼ਾਦ ਅਲਬਰਟਾ ਦੇ ਨਾਗਰਿਕਾਂ ਕੋਲ ਕੈਨੇਡੀਅਨ ਨਾਗਰਿਕਤਾ ਅਤੇ ਪਾਸਪੋਰਟ ਦੋਵੇਂ ਮੌਜੂਦ ਰਹਿਣਗੇ।

ਕੈਨੇਡਾ ਵਿੱਚ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਅਤੇ ਡਾਟਾ ਸੈਂਟਰਾਂ ਦਾ ਉਦਯੋਗ ਤੇਜ਼ੀ ਨਾਲ ਪੈਰ ਪਸਾਰ ਰਿਹਾ ਹੈ। ਵੱਖ-ਵੱਖ ਸੰਗਠਨਾਂ ਅਤੇ ਸਥਾਨਕ ਲੋਕਾਂ ਵੱਲੋਂ ਕੀਤੇ ਜਾ ਰਹੇ ਤਿੱਖੇ ਵਿਰੋਧ ਦੇ ਬਾਵਜੂਦ, ਅਲਬਰਟਾ ਸੂਬਾ ਇਸ ਤਕਨੀਕੀ ਕ੍ਰਾਂਤੀ ਦੇ ਇੱਕ ਵੱਡੇ ਕੇਂਦਰ ਵਜੋਂ ਉੱਭਰ ਰਿਹਾ ਹੈ। ਵੱਡੀਆਂ ਤਕਨੀਕੀ ਕੰਪਨੀਆਂ ਇਸ ਖੇਤਰ ਵਿੱਚ ਅਰਬਾਂ ਡਾਲਰ ਦਾ ਨਿਵੇਸ਼ ਕਰ ਰਹੀਆਂ ਹਨ। ਡਾਟਾ ਸੈਂਟਰਾਂ ਦੇ ਨਿਰਮਾਣ ਲਈ ਅਲਬਰਟਾ ਕੰਪਨੀਆਂ ਦੀ ਪਹਿਲੀ ਪਸੰਦ ਬਣਿਆ ਹੋਇਆ ਹੈ। ਡਾਟਾ ਸੈਂਟਰਾਂ ਅਤੇ ਏ ਆਈ ਪ੍ਰੋਸੈਸਿੰਗ ਲਈ ਬਹੁਤ ਵੱਡੀ ਮਾਤਰਾ ਵਿੱਚ ਊਰਜਾ ਦੀ ਲੋੜ ਹੁੰਦੀ ਹੈ, ਜੋ ਅਲਬਰਟਾ ਵਿੱਚ ਆਸਾਨੀ ਨਾਲ ਉਪਲਬਧ ਹੈ। ਅਲਬਰਟਾ ਦਾ ਕੁਦਰਤੀ ਠੰਢਾ ਮੌਸਮ ਸਰਵਰਾਂ ਨੂੰ ਠੰਢਾ ਰੱਖਣ ਵਿੱਚ ਮਦਦ ਕਰਦਾ ਹੈ, ਜਿਸ ਨਾਲ ਕੂਲਿੰਗ ‘ਤੇ ਹੋਣ ਵਾਲਾ ਖ਼ਰਚਾ ਘਟਦਾ ਹੈ।

ਹੈਲਟਨ ਰੀਜਨਲ ਪੁਲਿਸ ਨੇ ਦੋ ਵੱਖ-ਵੱਖ ਮਾਮਲਿਆਂ ਦੀ ਜਾਂਚ ਤੋਂ ਬਾਅਦ ਗੱਡੀਆਂ ਚੋਰੀ ਕਰਨ ਵਾਲੇ ਦੋ ਵੱਡੇ ਸੰਗਠਿਤ ਗੈਂਗਾਂ ਦਾ ਭਾਂਡਾ ਫੋੜਿਆ ਹੈ। ਇਸ ਕਾਰਵਾਈ ਦੌਰਾਨ ਚਾਰ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰਕੇ ਦਰਜਨਾਂ ਅਪਰਾਧਿਕ ਮਾਮਲੇ ਦਰਜ ਕੀਤੇ ਗਏ ਹਨ। ਪਹਿਲੇ ਮਾਮਲੇ ‘ਚ ਓਕਵਿਲ ਦੇ ਹੋਟਲਾਂ ਵਿੱਚ ਗੱਡੀਆਂ ਦੀ ਚੋਰੀ ਦੀਆਂ ਵਧਦੀਆਂ ਘਟਨਾਵਾਂ ਨੂੰ ਦੇਖਦੇ ਹੋਏ ਜਾਂਚ ਸ਼ੁਰੂ ਕੀਤੀ ਗਈ ਸੀ। 27 ਮਈ ਨੂੰ ਪੁਲਿਸ ਨੇ ਇੱਕ ਹੋਟਲ ਦੀ ਪਾਰਕਿੰਗ ਵਿੱਚੋਂ ਗੱਡੀ ਚੋਰੀ ਕਰਨ ਦੀ ਕੋਸ਼ਿਸ਼ ਕਰਦੇ ਹੋਏ ਦੋ ਸ਼ੱਕੀ ਨੌਜਵਾਨਾਂ ਨੂੰ ਮੌਕੇ ‘ਤੇ ਦਬੋਚ ਲਿਆ। ਮੁਲਜ਼ਮ ਜਿਸ ਡੌਜ ਡੁਰੈਂਗੋ ਗੱਡੀ ਵਿੱਚ ਆਏ ਸਨ, ਉਹ ਵੀ ਚੋਰੀ ਦੀ ਨਿਕਲੀ। ਗ੍ਰਿਫ਼ਤਾਰ ਕੀਤੇ ਗਏ ਮੁਲਜ਼ਮਾਂ ਦੀ ਪਛਾਣ ਬਰੈਂਪਟਨ ਦੇ 21 ਸਾਲਾ ਜੋਬਨਪ੍ਰੀਤ ਸਿੰਘ ਅਤੇ 26 ਸਾਲਾ ਆਤਿਸ਼ ਸਿੰਘ ਵਜੋਂ ਹੋਈ ਹੈ।

ਹੋਰ ਜਾਣਕਾਰੀ ਲਈ **TV Punjab** ਨਾਲ ਜੁੜੇ ਰਹੋ।

The post ਕੈਨੇਡਾ ਦੇ ਪਾਸਪੋਰਟ ਤੇ ਨਾਗਰਿਕਤਾ ਨੂੰ ਲੈ ਕੇ ਛਿੜੀ ਬਹਿਸ! CANADA NEWS appeared first on TV Punjab | Punjabi News Channel.