ਭਾਰਤੀ ਬੱਲੇਬਾਜ਼ ਵਿਰਾਟ ਕੋਹਲੀ ਨੇ ਸ਼ੁੱਕਰਵਾਰ ਨੂੰ ਤ੍ਰਿਨੀਦਾਦ ਦੇ ਪੋਰਟ ਆਫ ਸਪੇਨ ਦੇ ਕਵੀਨਜ਼ ਪਾਰਕ ਓਵਲ ‘ਚ ਵੈਸਟਇੰਡੀਜ਼ ਖਿਲਾਫ ਆਪਣੀ ਟੀਮ ਦੇ ਦੂਜੇ ਟੈਸਟ ਮੈਚ ਦੌਰਾਨ ਆਪਣਾ 29ਵਾਂ ਟੈਸਟ ਸੈਂਕੜਾ ਲਗਾਇਆ। ਇਸ ਮੌਕੇ ‘ਤੇ ਭਾਰਤੀ ਕ੍ਰਿਕਟ ਦੇ ਆਲ ਟਾਈਮ ਮਹਾਨ ਬੱਲੇਬਾਜ਼ ਸਚਿਨ ਤੇਂਦੁਲਕਰ ਨੇ ਉਨ੍ਹਾਂ ਨੂੰ ਵਧਾਈ ਦਿੱਤੀ।
ਤੇਂਦੁਲਕਰ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ਦੀ ਸਟੋਰੀ ‘ਤੇ ਕੋਹਲੀ ਦੀ ਫੋਟੋ ਪੋਸਟ ਕੀਤੀ ਅਤੇ ਲਿਖਿਆ, ”ਇਕ ਹੋਰ ਦਿਨ, ਵਿਰਾਟ ਕੋਹਲੀ ਦਾ ਇਕ ਹੋਰ ਸੈਂਕੜਾ, ਸ਼ਾਨਦਾਰ ਪ੍ਰਦਰਸ਼ਨ।”
ਕੋਹਲੀ ਨੇ ਸ਼ੈਨਨ ਗੈਬਰੀਅਲ ਦੇ ਖਿਲਾਫ ਕਵਰ ਡਰਾਈਵ ਦੇ ਨਾਲ ਆਪਣਾ 76ਵਾਂ ਅੰਤਰਰਾਸ਼ਟਰੀ ਸੈਂਕੜਾ ਪੂਰਾ ਕੀਤਾ। ਇਸ ਨਾਲ ਕੋਹਲੀ ਨੇ 500 ਮੈਚਾਂ ‘ਚ ਸਭ ਤੋਂ ਵੱਧ 75 ਸੈਂਕੜੇ ਲਗਾਉਣ ਦਾ ਤੇਂਦੁਲਕਰ ਦਾ ਰਿਕਾਰਡ ਤੋੜ ਦਿੱਤਾ।
ਪਿਛਲੇ ਟੈਸਟ ਵਿੱਚ ਸੈਂਕੜਾ ਲਗਾਉਣ ਤੋਂ ਖੁੰਝੇ ਕੋਹਲੀ ਨੇ 206 ਗੇਂਦਾਂ ਵਿੱਚ 121 ਦੌੜਾਂ ਬਣਾਈਆਂ। ਆਪਣੇ ਅੰਤਰਰਾਸ਼ਟਰੀ ਕਰੀਅਰ ਦੇ 76ਵੇਂ ਸੈਂਕੜੇ ਦੌਰਾਨ ਉਸ ਨੇ ਰਵਿੰਦਰ ਜਡੇਜਾ (61) ਨਾਲ ਪੰਜਵੀਂ ਵਿਕਟ ਲਈ 159 ਦੌੜਾਂ ਦੀ ਸਾਂਝੇਦਾਰੀ ਕਰਕੇ ਭਾਰਤ ਲਈ ਜ਼ਬਰਦਸਤ ਵਾਪਸੀ ਕੀਤੀ।
ਕੋਹਲੀ ਰਨ ਆਊਟ ਹੋਇਆ ਜਦਕਿ ਜਡੇਜਾ ਨੂੰ ਕੇਮਾਰ ਰੋਚ (ਦੋ ਵਿਕਟਾਂ) ਦੇ ਹੱਥੋਂ ਜੋਸ਼ੂਆ ਡਾ ਸਿਲਵਾ ਨੇ ਵਿਕਟ ਦੇ ਪਿੱਛੇ ਕੈਚ ਕਰਵਾਇਆ। ਦੁਪਹਿਰ ਦੇ ਖਾਣੇ ਤੱਕ ਈਸ਼ਾਨ ਕਿਸ਼ਨ (18) ਅਤੇ ਰਵੀਚੰਦਰਨ ਅਸ਼ਵਿਨ (ਛੇ) ਕ੍ਰੀਜ਼ ‘ਤੇ ਹਨ।
ਦਿਨ ਦਾ ਪਹਿਲਾ ਸੈਸ਼ਨ ਪੂਰੀ ਤਰ੍ਹਾਂ ਕੋਹਲੀ ਦੇ ਨਾਂ ਰਿਹਾ। ਉਸ ਨੂੰ ਵੈਸਟਇੰਡੀਜ਼ ਦੇ ਗੇਂਦਬਾਜ਼ਾਂ ਖ਼ਿਲਾਫ਼ ਦੌੜਾਂ ਬਣਾਉਣ ਵਿੱਚ ਕੋਈ ਮੁਸ਼ਕਲ ਨਹੀਂ ਆਈ। ਉਸ ਨੇ ਆਪਣੀ ਪਾਰੀ ਦੌਰਾਨ 11 ਚੌਕੇ ਜੜੇ ਜਦਕਿ 77 ਦੌੜਾਂ ਬਣਾਈਆਂ।
87 ਦੌੜਾਂ ਨਾਲ ਦਿਨ ਦੀ ਸ਼ੁਰੂਆਤ ਕਰਨ ਵਾਲੇ ਕੋਹਲੀ ਨੇ ਰੋਚ ਦੀ ਗੇਂਦ ‘ਤੇ ਚੌਕਾ ਲਗਾ ਕੇ ਆਪਣਾ ਸੈਂਕੜਾ ਪੂਰਾ ਕੀਤਾ। 2018 (ਪਰਥ ‘ਚ ਆਸਟ੍ਰੇਲੀਆ ਖਿਲਾਫ) ਤੋਂ ਬਾਅਦ ਵਿਦੇਸ਼ੀ ਧਰਤੀ ‘ਤੇ ਕੋਹਲੀ ਦਾ ਇਹ ਪਹਿਲਾ ਸੈਂਕੜਾ ਹੈ।
ਵੈਸਟਇੰਡੀਜ਼ ਖਿਲਾਫ ਕੋਹਲੀ ਦਾ ਇਹ 12ਵਾਂ ਸੈਂਕੜਾ ਹੈ ਅਤੇ ਉਹ ਇਸ ਟੀਮ ਖਿਲਾਫ ਸਭ ਤੋਂ ਜ਼ਿਆਦਾ ਸੈਂਕੜੇ ਲਗਾਉਣ ਦੇ ਮਾਮਲੇ ‘ਚ ਜੈਕ ਕੈਲਿਸ ਦੇ ਨਾਲ ਸਾਂਝੇ ਤੌਰ ‘ਤੇ ਦੂਜੇ ਨੰਬਰ ‘ਤੇ ਹੈ। ਸਾਬਕਾ ਮਹਾਨ ਖਿਡਾਰੀ ਸੁਨੀਲ ਗਾਵਸਕਰ (13) ਨੇ ਵੈਸਟਇੰਡੀਜ਼ ਖਿਲਾਫ ਸਭ ਤੋਂ ਵੱਧ ਸੈਂਕੜੇ ਲਗਾਉਣ ਦਾ ਰਿਕਾਰਡ ਬਣਾਇਆ ਹੈ।
ਕੁਈਨਜ਼ ਪਾਰਕ ਓਵਲ ਦੀ ਪਿੱਚ ਡੋਮਿਨਿਕਾ ਵਿੱਚ ਖੇਡੇ ਗਏ ਪਹਿਲੇ ਟੈਸਟ ਦੇ ਮੁਕਾਬਲੇ ਹੁਣ ਤੱਕ ਬੱਲੇਬਾਜ਼ਾਂ ਲਈ ਵਧੇਰੇ ਮਦਦਗਾਰ ਰਹੀ ਹੈ। ਕੁਝ ਗੇਂਦਾਂ ਰੁਕ ਰਹੀਆਂ ਸਨ ਅਤੇ ਆਫ ਸਟੰਪ ਦੇ ਆਲੇ-ਦੁਆਲੇ ਵੈਸਟਇੰਡੀਜ਼ ਦੇ ਗੇਂਦਬਾਜ਼ ਕੋਹਲੀ ਖਿਲਾਫ ਸਖਤ ਗੇਂਦਬਾਜ਼ੀ ਕਰ ਰਹੇ ਸਨ। ਕੋਹਲੀ ਨੇ ਮੈਚ ‘ਚ ਕਾਫੀ ਸਮਝਦਾਰੀ ਦਿਖਾਉਂਦੇ ਹੋਏ ਹਮਲਾਵਰ ਸ਼ਾਟ ਖੇਡਣ ਦੀ ਬਜਾਏ ਇਕ ਅਤੇ ਦੋ ਦੌੜਾਂ ਬਣਾਉਣ ‘ਤੇ ਜ਼ਿਆਦਾ ਧਿਆਨ ਦਿੱਤਾ। ਉਸ ਨੇ 45 ਵਾਰ ਇੱਕ ਦੌੜ ਅਤੇ 13 ਵਾਰ ਦੋ ਦੌੜਾਂ ਬਣਾਈਆਂ। ਉਸ ਨੇ ਆਫ ਸਾਈਡ ‘ਤੇ 11 ‘ਚੋਂ 9 ਚੌਕੇ ਲਗਾਏ।
ਜਡੇਜਾ ਨੇ ਵੀ ਦੂਜੇ ਸਿਰੇ ਤੋਂ ਉਸ ਨੂੰ ਸ਼ਾਨਦਾਰ ਸਹਿਯੋਗ ਦਿੱਤਾ। ਉਸ ਨੇ ਕੋਹਲੀ ਦਾ ਸੈਂਕੜਾ ਪੂਰਾ ਹੋਣ ਦੇ ਤੁਰੰਤ ਬਾਅਦ ਹੀ ਟੈਸਟ ਕਰੀਅਰ ਦਾ 19ਵਾਂ ਅਰਧ ਸੈਂਕੜਾ ਪੂਰਾ ਕੀਤਾ। ਭਾਰਤ ਨੂੰ ਆਫ ਸਪਿਨਰ ਰਹਿਕੀਮ ਕੌਰਨਵਾਲ ਦੀ ਗੈਰ-ਮੌਜੂਦਗੀ ਦਾ ਫਾਇਦਾ ਹੋਇਆ। ਖੱਬੇ ਹੱਥ ਦੇ ਸਪਿਨਰ ਜੋਮੇਲ ਵਾਰਿਕਨ ਸਹੀ ਲਾਈਨ ਲੈਂਥ ‘ਤੇ ਗੇਂਦਬਾਜ਼ੀ ਕਰਨ ਦੇ ਬਾਵਜੂਦ ਪਿੱਚ ਤੋਂ ਜ਼ਿਆਦਾ ਮਦਦ ਨਹੀਂ ਲੈ ਸਕੇ।