ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀ.ਸੀ.ਸੀ.ਆਈ.) ਨੇ ਰੋਹਿਤ ਸ਼ਰਮਾ ਨੂੰ ਸ਼੍ਰੀਲੰਕਾ ਖਿਲਾਫ ਘਰੇਲੂ ਟੈਸਟ ਸੀਰੀਜ਼ ਲਈ ਭਾਰਤੀ ਟੈਸਟ ਟੀਮ ਦਾ ਨਵਾਂ ਕਪਤਾਨ ਨਿਯੁਕਤ ਕੀਤਾ ਹੈ। ਬੋਰਡ ਰੋਹਿਤ ਦੀ ਅਗਵਾਈ ‘ਚ ਕੇਐੱਲ ਰਾਹੁਲ, ਜਸਪ੍ਰੀਤ ਬੁਮਰਾਹ ਅਤੇ ਰਿਸ਼ਭ ਪੰਤ ਨੂੰ ਭਵਿੱਖ ਦੇ ਕਪਤਾਨ ਵਜੋਂ ਵਿਕਸਤ ਕਰਨ ਦਾ ਇੱਛੁਕ ਹੈ।
ਭਾਰਤੀ ਚੋਣ ਕਮੇਟੀ ਦੇ ਚੇਅਰਮੈਨ ਚੇਤਨ ਸ਼ਰਮਾ ਨੇ ਕਿਹਾ, ”ਰੋਹਿਤ ਸ਼ਰਮਾ ਕਪਤਾਨੀ ਲਈ ਹਰ ਕਿਸੇ ਦੀ ਪਹਿਲੀ ਪਸੰਦ ਸੀ। ਉਹ ਸਾਡੇ ਦੇਸ਼ ਦਾ ਨੰਬਰ ਇਕ ਕ੍ਰਿਕਟਰ ਹੈ ਅਤੇ ਸਭ ਤੋਂ ਖਾਸ ਗੱਲ ਇਹ ਹੈ ਕਿ ਉਹ ਤਿੰਨੋਂ ਫਾਰਮੈਟ ਖੇਡ ਰਿਹਾ ਹੈ। ਮਹੱਤਵਪੂਰਨ ਗੱਲ ਇਹ ਹੈ ਕਿ ਅਸੀਂ ਉਨ੍ਹਾਂ ਦੇ ਕੰਮ ਦੇ ਬੋਝ ਦੇ ਪ੍ਰਬੰਧਨ ਨੂੰ ਕਿਵੇਂ ਸੰਭਾਲਦੇ ਹਾਂ।”
ਰੋਹਿਤ ਦੇ ਕਪਤਾਨ ਹੋਣ ਦੇ ਨਾਲ ਹੀ ਨਵੇਂ ਕਪਤਾਨ ਤਿਆਰ ਕੀਤੇ ਜਾਣਗੇ ਅਤੇ ਇਹ ਸਪੱਸ਼ਟ ਹੋ ਗਿਆ ਹੈ ਕਿ ਦੱਖਣੀ ਅਫਰੀਕਾ ‘ਚ ਕੇਐੱਲ ਰਾਹੁਲ ਦੇ ਖਰਾਬ ਪ੍ਰਦਰਸ਼ਨ ਤੋਂ ਬਾਅਦ ਉਹ ਪ੍ਰਬੰਧਨ ਦੀ ਪਸੰਦ ਨਹੀਂ ਹੈ। ਉਸ ਨੇ ਕਿਹਾ, “ਕੇਐਲ ਰਾਹੁਲ, ਰਿਸ਼ਭ ਪੰਤ ਅਤੇ ਜਸਪ੍ਰੀਤ ਬੁਮਰਾਹ ਨੂੰ ਰੋਹਿਤ ਦੀ ਅਗਵਾਈ ਵਿੱਚ ਭਵਿੱਖ ਦੇ ਕਪਤਾਨ ਵਜੋਂ ਤਿਆਰ ਕੀਤਾ ਜਾਵੇਗਾ।”
ਸ਼ਰਮਾ ਨੇ ਕਿਹਾ, ”ਅਸੀਂ ਰਾਹੁਲ ਨੂੰ ਦੱਖਣੀ ਅਫਰੀਕਾ ‘ਚ ਕਪਤਾਨ ਬਣਾਇਆ ਸੀ। ਬੁਮਰਾਹ ਉੱਥੇ ਉਪ-ਕਪਤਾਨ ਸੀ ਅਤੇ ਸ਼੍ਰੀਲੰਕਾ ਖਿਲਾਫ ਵੀ ਇਹ ਭੂਮਿਕਾ ਨਿਭਾਉਣਗੇ। ਰਿਸ਼ਭ ਨੂੰ ਵੈਸਟਇੰਡੀਜ਼ ਖਿਲਾਫ ਟੀ-20 ‘ਚ ਉਪ ਕਪਤਾਨ ਬਣਾਇਆ ਗਿਆ ਸੀ। ਇਹ ਸੰਭਾਵੀ ਨੇਤਾ ਹਨ ਜਿਨ੍ਹਾਂ ਨੂੰ ਰੋਹਿਤ ਦੀ ਅਗਵਾਈ ਵਿੱਚ ਤਿਆਰ ਕੀਤਾ ਜਾਵੇਗਾ।”
ਭਾਰਤੀ ਟੈਸਟ ਟੀਮ: ਰੋਹਿਤ ਸ਼ਰਮਾ (ਕਪਤਾਨ), ਮਯੰਕ ਅਗਰਵਾਲ, ਪ੍ਰਿਯਾਂਕ ਪੰਚਾਲ, ਵਿਰਾਟ ਕੋਹਲੀ, ਸ਼੍ਰੇਅਸ, ਹਨੁਮਾ ਵਿਹਾਰੀ, ਸ਼ੁਭਮਨ ਗਿੱਲ, ਰਿਸ਼ਭ ਪੰਤ, ਕੇਐਸ ਭਰਤ, ਅਸ਼ਵਿਨ, ਰਵੀ ਜਡੇਜਾ, ਜਯੰਤ ਯਾਦਵ, ਕੁਲਦੀਪ, ਬੁਮਰਾਹ (ਉਪ-ਕਪਤਾਨ), ਸ਼ਮੀ, ਸਿਰਾਜ ਉਮੇਸ਼ ਯਾਦਵ, ਸੌਰਭ ਕੁਮਾਰ।