Ottawa- ਬੈਂਕ ਆਫ਼ ਕੈਨੇਡਾ ਵਲੋਂ ਵਿਆਜ ਦਰਾਂ ’ਚ ਹੋਰ ਵਾਧਾ ਅਜੇ ਵੀ ਵਿਚਾਰ ਅਧੀਨ ਹੈ, ਕਿਉਂਕਿ ਇਸਦੀ ਗਵਰਨਿੰਗ ਕੌਂਸਲ ਇਸ ਗੱਲ ’ਤੇ ਵੰਡੀ ਹੋਈ ਹੈ ਕਿ ਕੀ ਦਰਾਂ ਨੂੰ ਹੋਰ ਵਧਾਉਣ ਦੀ ਜ਼ਰੂਰਤ ਹੋ ਸਕਦੀ ਹੈ। ਕੇਂਦਰੀ ਬੈਂਕ ਨੇ ਬੁੱਧਵਾਰ ਨੂੰ ਆਪਣੇ ਵਿਚਾਰ-ਵਟਾਂਦਰੇ ਦਾ ਸਾਰ ਜਾਰੀ ਕੀਤਾ, ਜਿਸ ’ਚ ਗਵਰਨਿੰਗ ਕੌਂਸਲ ਅਗਵਾਈ ’ਚ ਮੈਂਬਰਾਂ ਵਲੋਂ 25 ਅਕਤੂਬਰ ਨੂੰ ਦਰਾਂ ਸੰਬੰਧੀ ਕੀਤੇ ਗਏ ਵਿਚਾਰ-ਵਟਾਂਦਰੇ ਦਾ ਵੇਰਵਾ ਦਿੱਤਾ ਗਿਆ ਹੈ। ਬੈਂਕ ਵਲੋਂ ਅਜੇ ਵੀ ਵਿਆਜ ਦਰਾਂ ਨੂੰ 5 ਫ਼ੀਸਦੀ ’ਤੇ ਹੀ ਬਰਕਰਾਰ ਰੱਖਿਆ ਗਿਆ ਹੈ। ਇਸ ਵੇਰਵੇ ਤੋਂ ਇਹ ਗੱਲ ਸਪਸ਼ਟ ਹੈ ਕਿ ਗਵਰਨਿੰਗ ਕੌਂਸਲ ਦੇ ਮੈਂਬਰ ਇਸ ਗੱਲ ਨੂੰ ਲੈ ਕੇ ਵੰਡੇ ਹੋਏ ਹਨ ਕਿ ਕੀ ਵਿਆਜ ਦਰਾਂ ਕਾਫ਼ੀ ਉੱਚੀਆਂ ਹਨ।
ਕੁਝ ਮੈਂਬਰਾਂ ਨੇ ਮਹਿਸੂਸ ਕੀਤਾ ਕਿ ਇਹ ਜ਼ਿਆਦਾ ਸੰਭਾਵਨਾ ਹੈ ਕਿ ਮਹਿੰਗਾਈ ਦਰ ਨੂੰ 2 ਫ਼ੀਸਦੀ ਦੇ ਟੀਚੇ ’ਤੇ ਵਾਪਸ ਲਿਆਉਣ ਲਈ ਨੀਤੀਗਤ ਦਰ ਨੂੰ ਹੋ ਵਧਾਉਣ ਦੀ ਲੋੜ ਹੋਵੇਗੀ। ਉੱਥੇ ਹੀ ਦੂਜੇ ਮੈਂਬਰਾਂ ਨੇ ਕਿਹਾ ਕਿ ਪੰਜ ਫ਼ੀਸਦੀ ਦੀ ਨੀਤੀ ਦਰ ਮਹਿੰਗਾਈ ਨੂੰ 2 ਫ਼ੀਸਦੀ ਦੇ ਟੀਚੇ ’ਤੇ ਲਿਆਉਣ ਲਈ ਕਾਫ਼ੀ ਹੋਵੇਗੀ। ਬੈਂਕ ਆਫ ਕੈਨੇਡਾ ਨੇ ਆਖਰਕਾਰ ਧੀਰਜ ਰੱਖਣ ਦਾ ਫੈਸਲਾ ਕੀਤਾ ਪਰ ਗਵਰਨਿੰਗ ਕੌਂਸਲ ਦੇ ਮੈਂਬਰ ਮੁੜ ਵਿਚਾਰ ਕਰਨ ਲਈ ਸਹਿਮਤ ਹੋਏ ਕਿ ਕੀ ਦਰਾਂ ਨੂੰ ਹੋਰ ਵਧਾਉਣ ਦੀ ਲੋੜ ਹੈ।
ਕੇਂਦਰੀ ਬੈਂਕ ਇਸ ਗੱਲ ਤੋਂ ਚਿੰਤਤ ਹੈ ਕਿ ਆਰਥਿਕਤਾ ’ਚ ਉੱਚ ਵਿਆਜ ਦਰਾਂ ਦੇ ਬਾਵਜੂਦ ਵੀ ਮਹਿੰਗਾਈ ਤੇਜ਼ੀ ਨਾਲ ਨਹੀਂ ਘੱਟ ਰਹੀ ਹੈ। ਹਾਲਾਂਕਿ ਕੈਨੇਡਾ ਦੀ ਮਹਿੰਗਾਈ ਦਰ ਸਤੰਬਰ ’ਚ ਘੱਟ ਕੇ 3.8 ਫੀਸਦੀ ’ਤੇ ਆ ਗਈ ਸੀ ਪਰ ਹਾਲ ਹੀ ਦੇ ਮਹੀਨਿਆਂ ’ਚ ਕੀਮਤਾਂ ਦੇ ਦਬਾਅ ’ਚ ਬਹੁਤੀ ਕਮੀ ਨਹੀਂ ਆਈ ਹੈ। ਕੇਂਦਰੀ ਬੈਂਕ ਮੁਤਾਬਕ ਮਹਿੰਗਾਈ ਦੇ ਮੁੱਖ ਮਾਪਦੰਡ, ਜੋ ਅਸਥਿਰ ਕੀਮਤਾਂ ਦੀ ਗਤੀ ਨੂੰ ਦੂਰ ਕਰਦੇ ਹਨ, ਪਿਛਲੇ ਸਾਲ ਦੇ ਮੁਕਾਬਲੇ 3.5 ਤੋਂ 4.0 ਫ਼ੀਸਦੀ ਦੀ ਰੇਂਜ ’ਚ ਰਹੇ ਹਨ। ਬੈਂਕ ਆਫ ਕੈਨੇਡਾ ਦੀ ਗਵਰਨਿੰਗ ਕੌਂਸਲ ਨੇ ਉੱਚੀ ਮਹਿੰਗਾਈ ਦੇ ਸਥਿਰ ਰਹਿਣ ਲਈ ਕਈ ਕਾਰਕਾਂ ਨੂੰ ਜ਼ਿੰਮੇਵਾਰ ਠਹਿਰਾਇਆ, ਜਿਨ੍ਹਾਂ’ਚ ਸ਼ੈਲਟਰ ਕੀਮਤਾਂ ’ਚ ਵਾਧਾ ਵੀ ਸ਼ਾਮਿਲ ਹੈ।

The post ਵਿਆਜ ਦਰਾਂ ’ਚ ਹੋਰ ਵਾਧੇ ਦੀ ਲੋੜ ਨੂੰ ਲੈ ਕੇ ਬੈਂਕ ਆਫ਼ ਕੈਨੇਡਾ ਦੀ ਗਵਰਨਿੰਗ ਕੌਂਸਲ ’ਚ ਪਈ ਫੁੱਟ appeared first on TV Punjab | Punjabi News Channel.

Ottawa- ਪ੍ਰਵਾਸੀ ਹੁਣ ਕੈਨੇਡਾ ਛੱਡ ਕੇ ਦੂਜੇ ਦੇਸ਼ਾਂ ’ਚ ਜਾ ਰਹੇ ਹਨ। ਕੈਨੇਡਾ ਛੱਡਣ ਵਾਲੇ ਪ੍ਰਵਾਸੀਆਂ ਦੀ ਗਿਣਤੀ ਲਗਾਤਾਰ ਵਧਦੀ ਜਾ ਰਹੀ ਹੈ। ਇੱਕ ਰਿਪੋਰਟ ਮੁਤਾਬਕ 2016 ਤੋਂ 2019 ਦਰਮਿਆਨ ਕੈਨੇਡਾ ਛੱਡਣ ਵਾਲੇ ਪ੍ਰਵਾਸੀਆਂ ਦੀ ਗਿਣਤੀ ’ਚ ਰਿਕਾਰਡ ਵਾਧਾ ਹੋਇਆ ਹੈ। ਰਿਪੋਰਟ ਸਾਹਮਣੇ ਆਉਣ ਤੋਂ ਬਾਅਦ ਕੈਨੇਡਾ ਸਰਕਾਰ ਦੇ ਸਾਹਮਣੇ ਵੱਡੀ ਚੁਣੌਤੀ ਖੜ੍ਹੀ ਹੋ ਗਈ ਹੈ। ਆਰਥਿਕਤਾ ਨੂੰ ਹੁਲਾਰਾ ਦੇਣ ਲਈ ਸਰਕਾਰ ਨੂੰ ਨਵੇਂ ਲੋਕਾਂ ਨੂੰ ਪਰਮਿਟ ਦੇਣ ਦੀ ਅਪੀਲ ਕੀਤੀ ਗਈ ਹੈ।
ਇੰਸਟੀਚਿਊਟ ਫਾਰ ਕੈਨੇਡੀਅਨ ਸਿਟੀਜ਼ਨਸ਼ਿਪ (ਆਈ. ਸੀ. ਸੀ.) ਅਤੇ ਕਾਨਫਰੰਸ ਬੋਰਡ ਆਫ਼ ਕੈਨੇਡਾ ਵਲੋਂ ਕਰਵਾਏ ਗਏ ਖੋਜ ਦੇ ਅਨੁਸਾਰ, ਔਸਤਨ 0.9 ਪ੍ਰਤੀਸ਼ਤ ਲੋਕ ਜਿਨ੍ਹਾਂ ਨੂੰ 1982 ਜਾਂ ਬਾਅਦ ’ਚ ਪੀ. ਆਰ. ਦਿੱਤੀ ਗਈ ਸੀ, ਉਹ ਹਰ ਸਾਲ ਕੈਨੇਡਾ ਛੱਡ ਦਿੱਤਾ। 2019 ’ਚ ਇਹ ਅੰਕੜਾ ਵੱਧ ਕੇ 1.18 ਫੀਸਦੀ ਹੋ ਗਿਆ, ਜੋ ਕਿ 31 ਫੀਸਦੀ ਤੋਂ ਵੱਧ ਹੈ।
ਰਿਪੋਰਟ ਦੇ ਖੋਜਕਰਤਾਵਾਂ ਦਾ ਕਹਿਣਾ ਹੈ ਕਿ 2017 ’ਚ ਕੈਨੇਡਾ ਛੱਡਣ ਦੀ ਦਰ ’ਚ ਵੀ ਵਾਧਾ ਹੋਇਆ ਹੈ। 2016 ’ਚ ਇਹ 0.8 ਫੀਸਦੀ ਤੋਂ ਵਧ ਕੇ 1.15 ਫੀਸਦੀ ਹੋ ਗਈ। ਦੂਜੇ ਸ਼ਬਦਾਂ ’ਚ ਆਖੀਏ ਤਾਂ 2019 ’ਚ ਲਗਭਗ 67,000 ਲੋਕਾਂ ਨੇ ਕੈਨੇਡਾ ਛੱਡਿਆ ਅਤੇ 2017 ਵਿਚ ਲਗਭਗ 60,000 ਲੋਕਾਂ ਨੇ ਕੈਨੇਡਾ ਛੱਡ ਦਿੱਤਾ। ਇਸਦਾ ਮਤਲਬ ਇਹ ਹੈ ਕਿ 1982 ਅਤੇ 2018 ਦੇ ਵਿਚਕਾਰ ਸਥਾਈ ਨਿਵਾਸ ਪ੍ਰਾਪਤ ਕਰਨ ਵਾਲੇ ਅਸਾਧਾਰਨ ਤੌਰ ’ਤੇ ਵੱਡੀ ਗਿਣਤੀ ਵਿੱਚ ਪ੍ਰਵਾਸੀਆਂ ਨੇ 2016 ਅਤੇ 2019 ਦੇ ਵਿਚਕਾਰ ਦੇਸ਼ ਛੱਡਣਾ ਪਸੰਦ ਕੀਤਾ। ਖੋਜ ਇਹ ਵੀ ਦੱਸਦੀ ਹੈ ਕਿ ਦੇਸ਼ ਛੱਡਣ ਵਾਲੇ ਪ੍ਰਵਾਸੀਆਂ ਦੀ ਗਿਣਤੀ ਆਮ ਤੌਰ ’ਤੇ 1990 ਦੇ ਦਹਾਕੇ ਤੋਂ ਵਧਦੀ ਜਾ ਰਹੀ ਹੈ।
ਇਸ ਨੂੰ ਲੈ ਕੇ ਆਈਸੀਸੀ ਦੇ ਮੁੱਖ ਕਾਰਜਕਾਰੀ ਡੈਨੀਅਲ ਬਰਨਹਾਰਡ ਦਾ ਕਹਿਣਾ ਹੈ ਕਿ ਸਾਨੂੰ ਉਨ੍ਹਾਂ ਕਾਰਨਾਂ ਨੂੰ ਸਮਝਣ ਦੀ ਲੋੜ ਹੈ, ਜਿਨ੍ਹਾਂ ਦੇ ਚੱਲਦਿਆਂ ਪ੍ਰਵਾਸੀ ਕੈਨੇਡਾ ਛੱਡ ਕੇ ਜਾ ਰਹੇ ਹਨ। ਉਨ੍ਹਾਂ ਆਖਿਆ ਕਿ ਸਾਨੂੰ ਇਹ ਮੰਨਣਾ ਹੋਵੇਗਾ ਕਿ ਰਿਹਾਇਸ਼, ਸਿਹਤ ਸੰਭਾਲ, ਹੋਰ ਕਿਸਮ ਦੀਆਂ ਸੇਵਾਵਾਂ ਦੀ ਉਪਲਬਧਤਾ ਦੀ ਘਾਟ ਇਸ ਦਾ ਹਿੱਸਾ ਹੈ। ਅਧਿਐਨ ਵਿੱਚ ਉਹ ਲੋਕ ਸ਼ਾਮਲ ਸਨ ਜਿਨ੍ਹਾਂ ਨੂੰ 1982 ਅਤੇ 2018 ਦੇ ਵਿਚਕਾਰ ਸਥਾਈ ਨਿਵਾਸ ਦਿੱਤਾ ਗਿਆ ਸੀ ਅਤੇ ਜਿਨ੍ਹਾਂ ਨੇ ਕੈਨੇਡਾ ਵਿੱਚ ਉਤਰਨ ਤੋਂ ਬਾਅਦ ਘੱਟੋ-ਘੱਟ ਇੱਕ ਵਾਰ ਟੈਕਸ ਭਰਿਆ ਸੀ।

The post ਵੱਡੀ ਗਿਣਤੀ ’ਚ ਕੈਨੇਡਾ ਛੱਡ ਕੇ ਦੂਜੇ ਦੇਸ਼ਾਂ ਵੱਲ ਜਾ ਰਹੇ ਹਨ ਪ੍ਰਵਾਸੀ appeared first on TV Punjab | Punjabi News Channel.

Ottawa- ਨੈਸ਼ਨਲ ਪੇਰੋਲ ਇੰਸਟੀਚਿਊਟ ਦੁਆਰਾ ਕੀਤੇ ਗਏ ਇੱਕ ਸਰਵੇਖਣ ਅਨੁਸਾਰ, ਕੈਨੇਡੀਅਨ ਮਹਿੰਗਾਈ, ਵਿਆਜ ਦਰਾਂ ਅਤੇ ਰਹਿਣ-ਸਹਿਣ ਦੀ ਲਾਗਤ ਕਾਰਨ ਆਪਣੇ ਬਟੂਏ ’ਤੇ ਲਗਾਤਾਰ ਦਬਾਅ ਮਹਿਸੂਸ ਕਰ ਰਹੇ ਹਨ, ਜਿਸ ਕਾਰਨ ‘ਤਿੱਖੀ ਵਿੱਤੀ ਤਣਾਅ ਵਾਲਾ ਤੂਫਾਨ’ ਪੈਦਾ ਹੋ ਰਿਹਾ ਹੈ।
1,500 ਕੰਮ ਕਰਨ ਵਾਲੇ ਕੈਨੇਡੀਅਨਾਂ ਦੇ ਸਰਵੇਖਣ, ਜਿਨ੍ਹਾਂ ਵਿੱਚ 81 ਪ੍ਰਤੀਸ਼ਤ ਫੁੱਲ-ਟਾਈਮ ਕਾਮੇ ਸ਼ਾਮਿਲ ਸਨ, ’ਚ ਇਹ ਗੱਲ ਸਾਹਮਣੇ ਆਈ ਕਿ ਆਪਣੇ ਆਪ ਨੂੰ ਵਿੱਤੀ ਤੌਰ ’ਤੇ ਤਣਾਅਗ੍ਰਸਤ ਮੰਨਣ ਵਾਲੇ ਲੋਕਾਂ ਦੀ ਗਿਣਤੀ ਪਿਛਲੇ ਸਾਲ 20 ਪ੍ਰਤੀਸ਼ਤ ਵਧ ਕੇ ਕੁੱਲ ਮਿਲਾ ਕੇ 37 ਪ੍ਰਤੀਸ਼ਤ ਹੋ ਗਈ ਹੈ।
ਐਨ. ਪੀ. ਆਈ. ਦੇ ਪ੍ਰਧਾਨ ਪੀਟਰ ਜ਼ਾਨੇਟਾਕਿਸ ਦੇ ਅਨੁਸਾਰ, ਸੰਗਠਨ ਨੇ 2014 ਤੋਂ ਸਰਵੇਖਣ ਕੀਤੇ ਹਨ ਅਤੇ ਪਾਇਆ ਹੈ ਕਿ ਕਰਜ਼ੇ ਨੂੰ ਘਟਾਉਣਾ, ਵਧੇਰੇ ਬੱਚਤ ਕਰਨਾ ਅਤੇ ਘੱਟ ਖਰਚ ਕਰਨਾ ਇਹ ਨਿਰਧਾਰਤ ਕਰਨ ’ਚ ਮਦਦ ਕਰਦਾ ਹੈ ਕਿ ਕੀ ਵਿਅਕਤੀ ਜਾਂ ਤਾਂ ਵਿੱਤੀ ਤੌਰ ’ਤੇ ਅਰਾਮਦਾਇਕ, ਸਹਿਣਸ਼ੀਲ ਜਾਂ ਤਣਾਅ ਵਿੱਚ ਹਨ।
ਉਨ੍ਹਾਂ ਇੱਕ ਇੰਟਰਵਿਊ ’ਚ ਕਿਹਾ, ‘‘ਇੱਥੇ ਇੱਕ ਵਿੱਤੀ ਤੂਫਾਨ ਪੈਦਾ ਹੋ ਰਿਹਾ ਹੈ ਅਤੇ ਪਿਛਲੇ ਸਾਲ ਇਸ ’ਚ ਅਸਲ ’ਚ ਬਹੁਤ ਤਾਕਤ ਆਈ ਹੈ।’’ ਐਨ. ਪੀ. ਆਈ. ਰਿਪੋਰਟ ਸੁਝਾਅ ਦਿੰਦੀ ਹੈ ਕਿ ਪਿਛਲੇ 10 ਸਾਲਾਂ ਦੇ ਕਿਸੇ ਵੀ ਸਮੇਂ ਨਾਲੋਂ ਹੁਣ ਪੈਸੇ ਦੀ ਬਚਤ ਕਰਨਾ ਵਧੇਰੇ ਮੁਸ਼ਕਲ ਹੈ ਅਤੇ ਸਰਵੇਖਣ ’ਚ ਸ਼ਾਮਿਲ 66 ਪ੍ਰਤੀਸ਼ਤ ਲੋਕਾਂ ਨੇ ਕਿਹਾ ਕਿ ਉਹ ਆਪਣੇ-ਆਪ ਨੂੰ ਵਿੱਤੀ ਤੌਰ ’ਤੇ ਤਣਾਅਗ੍ਰਸਤ ਮੰਨਦੇ ਹਨ, ਤਨਖਾਹਾਂ ਦੇ ਹਿਸਾਬ ਨਾਲ ਜੀਵਨ ਬਤੀਤ ਕਰ ਰਹੇ ਹਨ, ਜਦਕਿ 50 ਪ੍ਰਤੀਸ਼ਤ ਲੋਕਾਂ ਨੇ ਕਿਹਾ ਕਿ ਉਹ ਆਪਣੇ-ਆਪ ਨੂੰ ਕਰਜ਼ੇ ਦੁਆਰਾ ਦੱਬੇ ਹੋਏ ਮਹਿਸੂਸ ਕਰ ਰਹੇ ਹਨ।

The post ਕੈਨੇਡੀਅਨਾਂ ਦੇ ਬਟੂਏ ’ਤੇ ਪਿਆ ਆਰਥਿਕ ਮੰਦੀ ਦਾ ਬੋਝ! appeared first on TV Punjab | Punjabi News Channel.