ਬੀਸੀ ਦੇ ਕੈਰੀਬੂ ਖੇਤਰ ‘ਚ ਬੇਕਾਬੂ ਹੋਈ ਜੰਗਲੀ ਅੱਗ, ਘਰ ਖਾਲੀ ਕਰਨ ਦੀ ਚਿਤਾਵਨੀ!

Victoria- ਬ੍ਰਿਟਿਸ਼ ਕੋਲੰਬੀਆ (B.C.) ਦੇ ਕੇਂਦਰੀ ਕੈਰੀਬੂ ਖੇਤਰ ‘ਚ ਤੇਜ਼ੀ ਨਾਲ ਫੈਲ ਰਹੀ ਬੇਕਾਬੂ ਜੰਗਲੀ ਅੱਗ (ਵਾਈਲਡਫਾਇਰ) ਕਾਰਨ ਪ੍ਰਸ਼ਾਸਨ ਵੱਲੋਂ ਇਵੇਕੂਏਸ਼ਨ ਅਲਰਟ (ਖਾਲੀ ਕਰਨ ਦੀ ਚਿਤਾਵਨੀ) ਜਾਰੀ ਕੀਤਾ ਗਿਆ ਹੈ। ਕੈਰੀਬੂ ਰੀਜਨਲ ਡਿਸਟ੍ਰਿਕਟ ਮੁਤਾਬਕ, ਇਹ ਅਲਰਟ ਕੌਮਸਟਾਕ ਝੀਲ ਤੋਂ ਲਗਭਗ 4 ਕਿਲੋਮੀਟਰ ਦੱਖਣ-ਪੱਛਮ ਅਤੇ ਪ੍ਰਿੰਸ ਜਾਰਜ ਤੋਂ 100 ਕਿਲੋਮੀਟਰ ਦੱਖਣ-ਪੱਛਮ ‘ਚ ਸਥਿਤ ‘ਸਵੀਡ ਕਰੀਕ’ (Swede Creek) ਦੇ ਨੇੜੇ ਪੈਂਦੀਆਂ 6 ਪੇਂਡੂ ਜਾਇਦਾਦਾਂ ਲਈ ਜਾਰੀ ਕੀਤਾ ਗਿਆ ਹੈ।
ਖੇਤਰੀ ਅਧਿਕਾਰੀਆਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਅੱਗ ਬਹੁਤ ਤੇਜ਼ੀ ਨਾਲ ਫੈਲ ਰਹੀ ਹੈ, ਜਿਸ ਕਾਰਨ ਲੋਕਾਂ ਦੀ ਜਾਨ ਅਤੇ ਸਿਹਤ ਨੂੰ ਵੱਡਾ ਖ਼ਤਰਾ ਪੈਦਾ ਹੋ ਸਕਦਾ ਹੈ। ਪ੍ਰਸ਼ਾਸਨ ਨੇ ਇਲਾਕਾ ਨਿਵਾਸੀਆਂ ਨੂੰ ਅਪੀਲ ਕੀਤੀ ਹੈ ਕਿ ਜੇਕਰ ਇਸ ਅਲਰਟ ਨੂੰ ‘ਇਵੇਕੂਏਸ਼ਨ ਆਰਡਰ’ (ਤੁਰੰਤ ਘਰ ਖਾਲੀ ਕਰਨ ਦੇ ਹੁਕਮ) ‘ਚ ਬਦਲਿਆ ਜਾਂਦਾ ਹੈ, ਤਾਂ ਉਨ੍ਹਾਂ ਕੋਲ ਆਪਣੇ ਪਰਿਵਾਰਕ ਮੈਂਬਰਾਂ ਜਾਂ ਸਾਥੀਆਂ ਨੂੰ ਸੁਰੱਖਿਅਤ ਬਾਹਰ ਕੱਢਣ ਦਾ ਪੂਰਾ ਪਲਾਨ ਤਿਆਰ ਹੋਣਾ ਚਾਹੀਦਾ ਹੈ।
ਬੀਸੀ ਵਾਈਲਡਫਾਇਰ ਸਰਵਿਸ ਵੱਲੋਂ ਬੁੱਧਵਾਰ ਦੁਪਹਿਰ ਨੂੰ ਜਾਰੀ ਅਪਡੇਟ ਮੁਤਾਬਕ, ਸੋਮਵਾਰ ਨੂੰ ਸ਼ੁਰੂ ਹੋਈ ਇਹ ਅੱਗ ਹੁਣ 18 ਵਰਗ ਕਿਲੋਮੀਟਰ ਤੋਂ ਵੱਧ ਖੇਤਰ ਵਿੱਚ ਫੈਲ ਚੁੱਕੀ ਹੈ। ਮਾਹਰਾਂ ਨੇ ਦੱਸਿਆ ਕਿ ਤੇਜ਼ ਹਵਾਵਾਂ, ਉੱਚੇ ਤਾਪਮਾਨ ਅਤੇ ਲੰਬੇ ਸਮੇਂ ਤੋਂ ਚੱਲ ਰਹੇ ਸੋਕੇ ਕਾਰਨ ਅੱਗ ਦਾ ਵਿਵਹਾਰ ਬੇਹੱਦ ਹਿੰਸਕ ਹੈ ਅਤੇ ਇਸ ਦੇ ਹੋਰ ਵਧਣ ਦੀ ਪੂਰੀ ਸੰਭਾਵਨਾ ਹੈ।ਪ੍ਰਸ਼ਾਸਨ ਨੇ ਲੋਕਾਂ ਨੂੰ ਆਪਣੇ ‘ਗ੍ਰੈਬ-ਐਂਡ-ਗੋ’ (ਤੁਰੰਤ ਨਿਕਲਣ ਵਾਲੇ) ਬੈਗ ਤਿਆਰ ਰੱਖਣ ਲਈ ਕਿਹਾ ਹੈ। ਇਸ ‘ਚ ਕੱਪੜੇ, ਤਿਆਰ ਭੋਜਨ, ਦਵਾਈਆਂ, ਐਨਕਾਂ, ਜ਼ਰੂਰੀ ਦਸਤਾਵੇਜ਼ ਅਤੇ ਕੀਮਤੀ ਸਮਾਨ ਸ਼ਾਮਲ ਹੋਣਾ ਚਾਹੀਦਾ ਹੈ। ਅੱਗ ‘ਤੇ ਕਾਬੂ ਪਾਉਣ ਲਈ ਜ਼ਮੀਨੀ ਅਮਲਾ ਅਤੇ ਭਾਰੀ ਮਸ਼ੀਨਰੀ ਫਾਇਰ ਗਾਰਡ ਬਣਾਉਣ ‘ਚ ਜੁਟੀ ਹੋਈ ਹੈ, ਜਦਕਿ ਏਅਰ-ਟੈਂਕਰ, ਸਕਿਮਰ ਅਤੇ ਹੈਲੀਕਾਪਟਰ ਅਸਮਾਨ ਤੋਂ ਪਾਣੀ ਅਤੇ ਕੈਮੀਕਲ ਸੁੱਟ ਕੇ ਅੱਗ ਨੂੰ ਸ਼ਾਂਤ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਅੱਗ ਲੱਗਣ ਦੇ ਅਸਲ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।