ਨਵੀਂ ਦਿੱਲੀ। ਭਾਰਤ ਅਤੇ ਵੈਸਟਇੰਡੀਜ਼ ਕ੍ਰਿਕਟ ਟੀਮ ਵਿਚਾਲੇ ਚੱਲ ਰਹੀ ਪੰਜ ਮੈਚਾਂ ਦੀ ਟੀ-20 ਸੀਰੀਜ਼ ਦਾ ਚੌਥਾ ਮੈਚ ਸ਼ਨੀਵਾਰ ਨੂੰ ਫਲੋਰੀਡਾ ਦੇ ਲਾਡਰਹਿਲ ਦੇ ਸੈਂਟਰਲ ਬ੍ਰੋਵਾਰਡ ਰੀਜਨਲ ਪਾਰਕ ਸਟੇਡੀਅਮ ਟਰਫ ਗਰਾਊਂਡ ‘ਤੇ ਖੇਡਿਆ ਜਾਵੇਗਾ। ਇਸ ਮੈਚ ‘ਚ ਜਦੋਂ ਭਾਰਤੀ ਟੀਮ ਮੈਦਾਨ ‘ਚ ਉਤਰੇਗੀ ਤਾਂ ਸਭ ਦੀਆਂ ਨਜ਼ਰਾਂ 31 ਸਾਲਾ ਸਟਾਰ ਬੱਲੇਬਾਜ਼ ਸੂਰਿਆਕੁਮਾਰ ਯਾਦਵ ‘ਤੇ ਹੋਣਗੀਆਂ। ਅਸਲ ‘ਚ ਜੇਕਰ ਯਾਦਵ ਅੱਜ ਦੇ ਮੈਚ ‘ਚ ਬੱਲੇ ਤੋਂ 50 ਹੋਰ ਦੌੜਾਂ ਬਣਾਉਂਦੇ ਹਨ ਤਾਂ ਉਹ ਆਈਸੀਸੀ ਟੀ-20 ਰੈਂਕਿੰਗ ‘ਚ ਪਾਕਿਸਤਾਨ ਦੇ ਬੱਲੇਬਾਜ਼ ਬਾਬਰ ਆਜ਼ਮ ਨੂੰ ਪਿੱਛੇ ਛੱਡ ਕੇ ਨੰਬਰ ਇਕ ਬੱਲੇਬਾਜ਼ ਬਣ ਜਾਵੇਗਾ।
ਬਾਬਰ ਆਜ਼ਮ ਫਿਲਹਾਲ 818 ਰੇਟਿੰਗ ਅੰਕਾਂ ਨਾਲ ਆਈਸੀਸੀ ਟੀ-20 ਰੈਂਕਿੰਗ ‘ਚ ਪਹਿਲੇ ਸਥਾਨ ‘ਤੇ ਹਨ। ਦੂਜੇ ਪਾਸੇ ਭਾਰਤੀ ਬੱਲੇਬਾਜ਼ ਸੂਰਿਆਕੁਮਾਰ ਯਾਦਵ 816 ਰੇਟਿੰਗ ਅੰਕਾਂ ਨਾਲ ਦੂਜੇ ਸਥਾਨ ‘ਤੇ ਹਨ। ਬਾਬਰ ਅਤੇ ਸੂਰਿਆਕੁਮਾਰ ਵਿਚਾਲੇ ਫਿਲਹਾਲ ਦੋ ਰੇਟਿੰਗ ਅੰਕਾਂ ਦਾ ਅੰਤਰ ਹੈ। ਯਾਦਵ ਨੇ ਹਾਲ ਹੀ ‘ਚ ਟੀ-20 ਰੈਂਕਿੰਗ ‘ਚ ਬਾਬਰ ਆਜ਼ਮ ਦੇ ਸਾਥੀ ਮੁਹੰਮਦ ਰਿਜ਼ਵਾਨ ਨੂੰ ਪਿੱਛੇ ਛੱਡ ਦਿੱਤਾ ਹੈ। ਯਾਦਵ ਤੋਂ ਪਹਿਲਾਂ ਰਿਜ਼ਵਾਨ ਦੂਜੇ ਸਥਾਨ ‘ਤੇ ਸੀ ਪਰ ਵੈਸਟਇੰਡੀਜ਼ ਖਿਲਾਫ ਤੀਜੇ ਟੀ-20 ਮੈਚ ‘ਚ ਅਰਧ ਸੈਂਕੜੇ ਤੋਂ ਬਾਅਦ ਯਾਦਵ ਦੂਜੇ ਸਥਾਨ ‘ਤੇ ਪਹੁੰਚ ਗਏ ਹਨ। ਦੂਜੇ ਪਾਸੇ ਰਿਜ਼ਵਾਨ ਇਕ ਸਥਾਨ ਖਿਸਕ ਕੇ ਤੀਜੇ ਸਥਾਨ ‘ਤੇ ਆ ਗਿਆ ਹੈ।
ਜ਼ਿਕਰਯੋਗ ਹੈ ਕਿ ਜਦੋਂ ਤੋਂ ਯਾਦਵ ਨੇ ਭਾਰਤੀ ਟੀਮ ‘ਚ ਕਦਮ ਰੱਖਿਆ ਹੈ, ਉਹ ਸ਼ਾਨਦਾਰ ਫਾਰਮ ‘ਚ ਚੱਲ ਰਿਹਾ ਹੈ। ਖਾਸ ਤੌਰ ‘ਤੇ ਟੀ-20 ਫਾਰਮੈਟ ‘ਚ ਉਸ ਦਾ ਬੱਲਾ ਜ਼ਬਰਦਸਤ ਚੱਲ ਰਿਹਾ ਹੈ। ਪਹਿਲਾਂ ਉਸ ਨੇ ਚੌਥੇ ਨੰਬਰ ‘ਤੇ ਆਪਣੀ ਕਾਬਲੀਅਤ ਸਾਬਤ ਕੀਤੀ ਅਤੇ ਹੁਣ ਉਹ ਓਪਨਿੰਗ ਕਰਦੇ ਹੋਏ ਵੀ ਦੌੜਾਂ ਬਣਾ ਰਿਹਾ ਹੈ। ਵੈਸਟਇੰਡੀਜ਼ ਖਿਲਾਫ ਚੱਲ ਰਹੀ ਸੀਰੀਜ਼ ‘ਚ ਸੂਰਿਆਕੁਮਾਰ ਯਾਦਵ ਨੇ ਤਿੰਨ ਮੈਚਾਂ ‘ਚ 111 ਦੌੜਾਂ ਬਣਾਈਆਂ ਹਨ ਅਤੇ ਉਹ ਇਸ ਸੂਚੀ ‘ਚ ਚੋਟੀ ‘ਤੇ ਹਨ।
ਯਾਦਵ ਦੇ ਟੀ-20 ਕ੍ਰਿਕਟ ਕਰੀਅਰ ਦੀ ਗੱਲ ਕਰੀਏ ਤਾਂ ਦੇਸ਼ ਲਈ ਹੁਣ ਤੱਕ 22 ਮੈਚ ਖੇਡ ਕੇ ਉਨ੍ਹਾਂ ਨੇ 20 ਪਾਰੀਆਂ ‘ਚ 38.1 ਦੀ ਔਸਤ ਨਾਲ 648 ਦੌੜਾਂ ਬਣਾਈਆਂ ਹਨ। ਟੀ-20 ਕ੍ਰਿਕੇਟ ਵਿੱਚ ਉਸਦੇ ਨਾਮ ਇੱਕ ਸੈਂਕੜਾ ਅਤੇ ਪੰਜ ਅਰਧ ਸੈਂਕੜੇ ਹਨ। ਕ੍ਰਿਕਟ ਦੇ ਸਭ ਤੋਂ ਛੋਟੇ ਫਾਰਮੈਟ ਵਿੱਚ ਯਾਦਵ ਦਾ ਨਿੱਜੀ ਸਰਵੋਤਮ ਬੱਲੇਬਾਜ਼ੀ ਪ੍ਰਦਰਸ਼ਨ 117 ਦੌੜਾਂ ਹੈ।